"დემოკრატიის კვლევის ინსტიტუტი" ცხინვალში ქართველი სამოქალაქო აქტივისტი თამარ მეარაყიშვილის დაკავებას ეხმაურება. მათ მიერ გავრცელებულ განცხადებაში ვკითხულობთ, რომ დაკავებამდე მეარაყიშვილმა რეგიონში ადამიანის უფლებების სისტემურ დარღვევებზე სასაუბროდ საკუთარ Facebook-გვერდზე საჯაროდ მიმართა თვითაღიარებულ პრეზიდენტ ალან გაგლოევს და შეხვედრა სთხოვა. შეხვედრაზე უარის მიღების შემდეგ, აქტივისტმა შიმშილობა დააანონსა.

"გავრცელებული ინფორმაციით, აქტივისტი თამარ მეარაყიშვილი სამხრეთ ოსეთის უშიშროებამ საქართველოს სპეციალურ სამსახურებთან და უცხოურ მედიასაშუალებებისთვის ინფორმაციის მიწოდების ბრალდებით დააკავა. ოჯახისთვის ამ წუთამდე უცნობია პატიმრობის გარემოებები, ამასთანავე რამდენად მიეცა მას დაცვის უფლებით სარგებლობის შესაძლებლობა და ზოგადად დაცულია თუ არა მისი უფლებები.

აღსანიშნავია, რომ მის დაკავებამდე რამდენიმე საათით ადრე თამარ მეარაყიშვილმა რეგიონში ადამიანის უფლებების სისტემურ დარღვევებზე სასაუბროდ საკუთარ Facebook გვერდზე შეხვედრის მოთხოვნით საჯაროდ მიმართა თვითაღიარებულ პრეზიდენტ ალან გაგლოევს. მსგავსი მოთხოვნით მეარაყიშვილმა დე-ფაქტო მთავრობას არაერთხელ მიმართა, თუმცა უშედეგოდ.

შეხვედრების მოთხოვნაზე დაუსაბუთებელი უარის გამო მან მშვიდობიანი პროტესტის უკიდურესი ფორმა, შიმშილობაც კი დააანონსა. წლებია, თამარ მეარაყიშვილი ცხინვალის თვითაღიარებული ხელისუფლების მხრიდან სისტემური რეპრესიებისა და დევნის მსხვერპლია. წარსულში, მას დევნიდნენ აბსურდული სისხლის სამართლის ბრალდებებით, შეუზღუდეს გადაადგილების თავისუფლება — ჩამოართვეს პასპორტი და მგზავრობის ნებართვა, რამაც მისი ოჯახისგან იზოლაცია გამოიწვია," — ვკითხულობთ "დემოკრატიის კვლევის ინსტიტუტის" განცხადებაში.

ინსტიტუტის ინფორმაციით, წლებია, თამარ მეარაყიშვილი ცხინვალის თვითაღიარებული ხელისუფლების მხრიდან სისტემური რეპრესიებისა და დევნის მსხვერპლია. წარსულში, მას
დევნიდნენ აბსურდული სისხლის სამართლის ბრალდებებით, შეუზღუდეს გადაადგილების თავისუფლება — ჩამოართვეს პასპორტი და მგზავრობის ნებართვა, რამაც მისი ოჯახისგან იზოლაცია გამოიწვია. პირველად თამარი 2017 წელს დააკავეს, მას პროკურატურა ადგილობრივი მმართველი პარტიის "ედინაია ოსეტიას" მიმართ ცილისწამებასა და ასევე სამხრეთ ოსეთის მოქალაქეობის უკანონოდ მოპოვებას ედავებოდა. 2023 წელს კი თამარი სისხლის სამართლის მორიგი დევნის გამო ოკუპირებული ახალგორის პროკურატურამ
"არაკეთილსინდისიერებასა და სახელმწიფო სტრუქტურების დისკრედიტაციის" ბრალდებებით დააკავა. ის როგორც 2017, ასევე 2023 წელს წარდგენილი ყველა უსაფუძვლო ბრალდებისგან გათავისუფლდა.

შეგახსენებთ, ოკუპირებულ ცხინვალში ქართველი სამოქალაქო აქტივისტი თამარ მეარაყიშვილი დააკავეს.