ცხინვალში ქართველი სამოქალაქო აქტივისტი თამარ მეარაყიშვილი დააკავეს. ინფორმაციას მისი დაკავების შესახებ რუსეთის მიერ ოკუპირებული სამხრეთ ოსეთის საინფორმაციო სააგენტო ავრცელებს.

"ნეტგაზეთის" ცნობით, თამარ მეარაყიშვილს ჯაშუშობაში ადანაშაულებენ.

"გამოძიების ვერსიით, საქართველოს მოქალაქე, რომელიც სამხრეთ ოსეთის ტერიტორიაზე იმყოფებოდა, ახორციელებდა ინფორმაციის შეგროვებასა და გადაცემას რესპუბლიკის სტრატეგიულად მნიშვნელოვანი ობიექტების შესახებ, რითაც საფრთხეს უქმნიდა ქვეყნის უსაფრთხოებას", — წერია ცხინვალის პროკურატურის მიერ გავრცელებულ განცხადებაში.

გუშინ შუადღისას მეარაყიშვილმა სოციალურ ქსელში განაცხადა, რომ შიმშილობას დაიწყებდა "ძალაუფლების თვითნებური გამოყენების, საჯარო სამსახურის შესახებ კანონის, შრომის კანონმდებლობისა და მისი უფლებების სრული უგულებელყოფის" წინააღმდეგ პროტესტის ნიშნად.

"დღეს კიდევ ერთხელ დავრეკე პრეზიდენტის მისაღებში და შეხვედრა ვთხოვე. ვაცნობე, რომ თუ დღეს არ დამხვდება, ხვალ ცხინვალის ცენტრალურ მოედანზე კორუფციის წინააღმდეგ სოლო პიკეტირებას დავიწყებ. დარწმუნებული ვარ, რომ ჩემს სახლში უსაფრთხოების ძალების რეიდი სწორედ ამ მიზეზს უკავშირდება", — განუცხადა გუშინ მეარაყიშვილმა "კავკაზსკი უზელს".

მეარაყიშვილმა ბოლო დღეების განმავლობაში რამდენჯერმე დაუკავშირდა ოკუპირებული სამხრეთ ოსეთის პარლამენტის თავმჯდომარეს, ალან მარგიევს, საკუთარი სოციალური ქსელის მეშვეობით და შეხვედრა ითხოვა. მან თქვა, რომ მოთხოვნა ე.წ. პარლამენტის მისაღებშიც შეიტანა, მაგრამ უშედეგოდ.

როგორც "კავკაზსკი უზელი" იტყობინება, ქართველი აქტივისტი თამარა მეარაყიშვილი ერთ წელზე მეტია ვერ იღებს ახალ პასპორტს, რაც მას ოკუპირებული სამხრეთ ოსეთის ფარგლებში გადაადგილებასა და დასაქმებაში ხელს უშლის. ის მიიჩნევს, რომ ხელისუფლების ქმედებები სოციალურ მედიაში მის კრიტიკულ პოსტებს უკავშირდება.

2024 წლის თებერვალში ჟურნალისტმა და აქტივისტმა თამარა მეარაყიშვილმა შიმშილობა გამოაცხადა. ის ლენინგორის რაიონული პროკურორის თანამდებობაზე დავით გურციევის დანიშვნას აპროტესტებდა, რომელმაც მის წინააღმდეგ ცილისწამების საქმეზე სისხლის სამართლის საქმედ აღძრა.