საერტაშორისო გამჭვირვალობა საქართველო (TI) სტატიას აქვეყნებს, რომელიც "ქართული ოცნების ანტიევროპული კურსის ერთ წელს" აჯამებს და რუსეთისკენ გადადგმულ 41 ნაბიჯს ასახელებს.

სტატიას ასეთი სახელი აქვს: "41 ნაბიჯი რუსეთისკენ — "ქართული ოცნების" ანტიევროპული კურსის ერთი წელი".

"ერთი წელი გავიდა 2024 წლის 28 ნოემბრიდან, როცა ქართული ოცნების პრემიერმინისტრმა, ირაკლი კობახიძემ, ქართული საზოგადოების უმრავლესობის ნების საწინააღმდეგოდ და რუსეთის საამებლად, საჯაროდ განაცხადა, რომ ქართულმა ოცნებამ დღის წესრიგიდან მოხსნა ევროკავშირის წევრობაზე მოლაპარაკების გახსნა. კობახიძის ამ ანტიკონსტიტუციურმა განცხადებამ არა მხოლოდ შეაჩერა საქართველოს ევროპული ინტეგრაციის პროცესი, არამედ დააზიანა საზოგადოების დემოკრატიული განვითარება და რისკის ქვეშ დააყენა საქართველოს სახელმწიფოებრივი დამოუკიდებლობის იდეა.

ამ ერთი წლის განმავლობაში ქართულმა ოცნებამ, რომელმაც 2024 წლის 26 ოქტომბრის საპარლამენტო არჩევნებზე მიიტაცა ხელისუფლება, მრავალგზის დაუდასტურა საქართველოს მოსახლეობას და საერთაშორისო დემოკრატიულ თანამეგობრობას, რომ ის წავა ყველაფერზე — დათრგუნავს მოქალაქეების თავისუფალ ნებას, აწამებს თავისუფლებისმოყვარე მოქალაქეებს, შეზღუდავს პოლიტიკურ პლურალიზმს და გაწყვეტს ყოველგვარ კავშირს საქართველოს სტრატეგიულ პარტნიორებთან, თუ ეს ყველაფერი ქვეყანაში ქართული ოცნების და ივანიშვილის ძალაუფლებას შეუქმნის საფრთხეს", — წერს TI.

"რუსეთისკენ გადადგმული 41 ნაბიჯის" სია ასეთია:

ანტიევროპული პოლიტიკური გადაწყვეტილებები

1. გააყალბა და რეალურად არ გამოიძია 2024 წლის ოქტომბრის გაყალბებული არჩევნები;
   
   
2. პარლამენტი შეიკრიბა კანონის მოთხოვნათა იგნორირებით;
   
   
3. დაარბია და აწამა მშვიდობიანი დემონსტრატები, მათ წინააღმდეგ გამოიყენა ქიმიური იარაღი, არ დასაჯა უკანონო ბრძანების გამცემი და ამ ბრძანების შემსრულებელი პირები;
   
   
4. საქართველოში გაჩდნენ სინდისის პატიმრები;
   
   
5. საქართველოში ოპოზიციური პარტიების ლიდერების უმრავლესობა დაპატიმრებულია პოლიტიკური ნიშნით და იმავდროულად, მათ მიმართ აღძრულია ახალი საქმეები სახელმწიფოს წინააღმდეგ დანაშაულების მოტივით;
   
   
6. ჟურნალისტებზე ფიზიკური და სიტყვიერი თავდასხმა ნორმა გახდა. კრიტიკული ჟურნალისტებისთვის საქართველოში მუშაობა საფრთხის შემცველია. საგამოძიებო უწყებებს არ გამოუძიებიათ ჟურნალისტებზე მიზანმიმართული დევნის და ფიზიკური ძალადობის ფაქტები;
   
   
7. მიიღო პოლიტიკური გადაწყვეტილება ქართული არასამთავრობო ორგანიზაციების დევნასთან დაკავშირებით და დაიწყო რეპრესიები სამოქალაქო სექტორის წინააღმდეგ;
   
   
8. მოახდინა მოქალაქეთა შორის სოლიდარობის კრიმინალიზება;
   
   
9. შექმნა პარლამენტის დროებითი საგამოძიებო კომისია პოლიტიკური ოპონენტების და პარტიების განადგურების და აკრძალვის მიზნით;

ანტიდემოკრატიული და თავისუფლების შემზღუდავი კანონები.

10. პარლამენტმა მიიღო კანონი ქართული არასამთავრობო ორგანიზაციების დევნისა და სტიგმატიზაციის მიზნით. "უცხოური აგენტების რეგისტრაციის აქტი";

11. "გრანტების შესახებ" კანონში შეტანილმა ცვლილებებმა ქართულ არასამთავრობო ორგანიზაციებს შეუზღუდა მოქალაქეების დახმარება და ზოგადად მათი საქმიანობა შეუძლებელი გახდა;

12. შეიზღუდა შეკრებების და მანიფესტაციების ჩატარება და მოხდა მიტინგების კრიმინალიზება;

13. დაიწყო დევნა ქართული ოცნების მაღალჩინოსნების კრიტიკის გამო, გაჩნდა ცენზურის მცდელობები;

14. გაუარესდა საარჩევნო კანონმდებლობა და გარემო;

15. გაუქმდა სიტყვის და გამოხატვის კონსტიტუციური უფლების გარანტიები;

16. მიიღეს მედიის შემზღუდველი კანონმდებლობა;

17. გამარტივდა პოლიტიკური პარტიების გაუქმების წესი;

18. საკონსტიტუციო სასამართლოში შევიდა "ქართული ოცნების" სარჩელი 3 მთავარი ოპოზიციური პარტიის აკრძალვის მოთხოვნით;

19. გაუქმდა საჯარო მოხელეების გარანტიები და მათი დევნა მარტივი გახდა;

20. ქართულმა ოცნებამ მიიღო ე.წ. "ოფშორების კანონი";

21. სასამართლო დარბაზები მედიისა და საზოგადოებისათვის დაიხურა;

22. პარლამენტი აღმასრულებელ ხელისუფლებაზე საპარლამენტო კონტროლს აღარ განახორციელებს;

23. "განათლების რეფორმა" ქართულ საგანმანათლებლო სირვცეს ევროპას აშორებს;

24. შეიზღუდა საზოგადოების ჩართულობა საჯარო გადაწყვეტილებების მიღების პროცესში.

მმართველობის სტრუქტურული ცვლილებები

25. გაუქმდა ეროვნული უსაფრთხოების საბჭო;

26. გაუქმდა სპეციალური საგამოძიებო სამსახური;

27. უქმდება ანტიკორუფციული ბიურო;

28. უქმდება პერსონალურ მონაცემთა დაცვის სამსახური;

29. გაუქმდა საჯარო სამსახურის ბიურო;

30. გაუქმდა დაზვერვის სამსახური;

31. პარლამენტში გაუქმდა გენდერული თანასწორობის საბჭო;

32. გაუქმდა სსიპ საინფორმაციო ცენტრი ნატო-სა და ევროკავშირის შესახებ.

ანტიევროპული საგარეო პოლიტიკა და რუსულ სივრცეში ინტეგრაცია

33. ბიძინა ივანიშვილმა და ქართულმა ოცნებამ მტრად გამოაცხადეს ევროპა, ამერიკის შეერთებული შტატები და დემოკრატიული საერთაშორისო ორგანიზაციები.

34. აშშ-მ შეაჩერა საქართველოსთან სტრატეგიული პარტნიორობა;

35. ქართულმა ოცნებამ უარი თქვა დასავლეთის საბიუჯეტო მხარდაჭერაზე;

36. დასავლური ქვეყნებისგან პერსონალური სანქციები მასშტაბური გახდა;

37. ქართული ოცნების მთავრობა არ მონაწილეობს ევროპულ სტრუქტურებს;

38. შეიქმნა რუსული სტილის ანტიდასავლური პროპაგანდის მანქანა;

39. ქართული ოცნების მთავრობამ განავითარა სტრატეგიული პარტნიორობა ჩინეთთან;

40. გაიზარდა რუსეთის კაპიტალის მონაწილეობა ქართულ ეკონომიკაში;

41. რუსეთიდან საქართველოს პორტში შემოვიდა რუსული კომპანიის ნავთობი, რომლის მფლობელი სანქცირებულია. ამჟამად ეს კომპანია "რუსნეფტი" სანქცირებულია ბრიტანეთის მთავრობის მიერ.