2022 წელს, სახელმწიფო უსაფრთხოების სამსახურის უფროსმა, გრიგოლ ლილუაშვილმა ტელეკომპანია მთავარს და ფორმულას ე.წ ქოლცენტრების საქმეზე "ცილისწამებისთვის" სამართლებრივი დავა მოუგო. ტელეკომპანიებმა მოქმედ სუს-ის უფროსზე სიუჟეტები მოამზადეს, სადაც საუბარი იყო — როგორ მფარველობდა გრიგოლ ლილუაშვილი ე.წ ქოლცენტრებს.

სასამართლოს გადაწყვეტილებით, მთავარ არხს სიმბოლურად ერთი ლარის გადახდა მოუწია.

ჟურნალისტი თეო გილიგაშვილი სოციალურ ქსელში წერს, რომ "სარჩელში, რომლითაც ლილუაშვილმა სასამართლოს მიმართა, ეწერა, რომ ე.წ ქოლ-ცენტრებზე მომზადებული რეპორტაჟების ეთერში გასვლის შემდეგ, ლილუაშვილმა განიცადა "მძიმე სულიერი ტკივილი".

"დაევალოს მოპასუხე შპს ფორმულას, დაევალოს შპს მთავარ არხს, ორი კვირის ვადაში გამოაქვეყნოს, გაავრცელოს ცნობა სასამართლო გადაწყვეტილების შესახებ, რომლითაც ცილისწამებაა, რომ — "გრიგოლ ლილუაშვილი მფარველობს და მთავარი ფიგურაა, ე.წ. ფულის ქურდობის, პირამიდა ქოლცენტრების საქმიანობაში," — ნაწყვეტი 2022 წლის სასამართლო განჩინებიდან.

შეგახსენებთ, რომ დღეს, 23 დეკემბერს, პროკურატურაში გამოკითხვის შემდეგ, სახელმწიფო უსაფრთხოების ყოფილი უფროსი, გრიგოლ ლილუაშვილი დააკავეს. უწყების განმარტებით, ყოფილ მაღალჩინოსანს ქრთამის აღების 4 ეპიზოდი ედება ბრალად, ერთ-ერთი ე.წ ქოლცენტრების საქმეს ეხება.

"მესამე ეპიზოდი შეეხება 2021-2023 წლებს, როდესაც მიუხედავად ამ მიმართულებით სახელმწიფოს მიერ დეკლარირებული სამართლებრივი ბრძოლისა, ქვეყანაში მაინც რჩებოდა რამდენიმე ათეული თაღლითური ქოლ-ცენტრი. მოწმეთა ჩვენებებით, აღნიშნული ქოლ-ცენტრებიდან დიდი უმრავლესობა ეკუთვნოდა პირთა ჯგუფს, რომლებიც მიღებული შემოსავლებიდან სხვადასხვა ოპოზიციურ მედიასაშუალებას აფინანსებდნენ, ხოლო ქოლ-ცენტრების შედარებით მცირე ნაწილის ძირითადი მფარველი იყო გრიგოლ ლილუაშვილი, რომელიც ამ საქმიანობას მისი ნათესავის, სანდრო ლილუაშვილის მეშვეობით ახორციელებდა," — განაცხადა გენერალურმა პროკურორმა დღევანდელ ბრიფინგზე.

შეგახსენებთ, პროკურატურამ ლილუაშვილისთვის აღმკვეთი ღონისძიების სახით პატიმრობას მოითხოვა. მას ბრალი სისხლის სამართლის კოდექსის 338-ე მუხლის მე-2 ნაწილის "გ" ქვეპუნქტით და მე-3 ნაწილის "ე" ქვეპუნქტით შეეფარდა, რაც წინასწარი შეთანხმებით ჯგუფის მიერ, განსაკუთრებით დიდი ოდენობით ქრთამის აღებას გულისხმობს და სასჯელის სახით 11-დან 15 წლამდე თავისუფლების აღკვეთას ითვალისწინებს.