22 დეკემბერს, საქართველოს ახალგაზრდა იურისტთა ასოციაციის თავმჯდომარის არჩევნები გაიმართა. ორგანიზაციის გამგეობამ საია-ს თავმჯდომარედ თამარ ონიანი აირჩია.

თამარ ონიანი 2023 წლიდან არის საიას ადამიანის უფლებების პროგრამის დირექტორი, ხოლო, 2022 წლიდან თავმჯდომარის მოადგილე და გამგეობის წევრი. 2025 წლიდან თამარ ონიანი ოქსფორდის უნივერსიტეტის ადამიანის უფლებათა საერთაშორისო სამართლის მეცნიერებათა სამაგისტრო პროგრამაზე სრული დაფინანსებით სწავლობს. ამავდროულად, არის მოწვეული ლექტორი რამდენიმე უნივერსიტეტში.

თამარი 2021 წლიდან საიაში ხელმძღვანელობდა საერთაშორისო სამართალწარმოების გუნდს, ხოლო, 2018 წელს მან საიაში მუშაობა სტრატეგიული სამართალწარმოების იურისტის პოზიციაზე დაიწყო. ამ პოზიციაზე თამარი ადამიანის უფლებათა ევროპულ სასამართლოში აწარმოებდა / ხელმძღვანელობდა სტრატეგიული მნიშვნელობის სამართლებრივ დავებს, რომლებიც შეეხებოდა შეკრებისა და გამოხატვის თავისუფლებას, წამების აკრძალვას, ოკუპირებულ ტერიტორიებსა და საზღვრისპირა რეგიონებში უფლებადარღვევებს და სხვა.

ნონა ქურდოვანიძე ორგანიზაციას სამი წლის მანძილზე ხელმძღვანელობდა. მან ამოწურა უფლებამოსილების ვადა, ხოლო საიას წესდების შესაბამისად, აღარ ჰქონდა მორიგ კენჭისყრაში მონაწილეობის უფლება. საიას გუნდი მადლიერია ნონა ქურდოვანიძის მიერ გაწეული საქმიანობისთვის. მისი ლიდერობით ჩვენ რთულ პერიოდში შევძელით ადამიანის უფლებებისთვის ბრძოლა და განახლებული შემართებით გავაგრძელებთ მუშაობას.

უფლებამოსილების ამოწურვის შემდეგ, საია-ს უკვე ყოფილმა თავმჯდომარემ, ნონა ქურდოვანიძემ მადლობ გადაუხადა საია-ს გუნდს და დაწერა, რომ " საია-ში რჩება გამგეობის წევრად და ორგანიზაციის მუდმივ გულშემატკივრად".

"დღეს იყო ჩემი ბოლო სამუშაო დღე საია-ში. ორგანიზაციაში, სადაც მოხალისეობრივ საწყისებზე 2008 წლის ბოლოს დავიწყე საქმიანობა და სხვადასხვა პოზიციაზე 17 წლის განმავლობაში ვიმუშავე. აქ გატარებული თითოეული დღე ჩემთვის საამაყო და უძვირფასესი გამოცდილებაა.

განსაკუთრებით საპასუხისმგებლო, ბოლო სამი წელი იყო, როდესაც ზედიზედ სამჯერ ვიყავი არჩეული თავმჯდომარედ. ეს იყო მაქსიმალური ვადა, რა ვადითაც შემეძლო თავმჯდომარე ვყოფილიყავი.

ბოლო სამი წელი, დაემთხვა სამოქალაქო საზოგადოების შეზღუდვის გამძაფრებულ ეტაპს. საქმიანობა გვიწევდა მუდმივი დისკრედიტაციის კამპანიების, დაშინების მცდელობების, რეპრესიული კანონების პირობებში. მიუხედავად ამისა, შევძელით, რომ ამ სამი წლის განმავლობაში არ გვეღალატა ორგანიზაციის ღირებულებებისთვის და მნიშვნელოვანი საქმეები გვეკეთებინა, რომლებსაც აქ არ ჩამოვთვლი.

დიდი მადლობა მინდა ვუთხრა საია-ს გუნდს, გამგეობას და თითოეულ თანამშრომელს. მეამაყება, რომ ერთ გუნდად ვუმკლავდებოდით სირთულეებს. განსაკუთრებით მინდა მადლობა გადავუხადო სამართლებრივი დახმარების პროგრამის დირექტორს შორენა ლოლაძეს, დემოკრატიული ინსტიტუტების მხარდაჭერის პროგრამის დირექტორებს ნანუკა ყრუაშვილს, შემდგომ — თამარ ხუხიას და უფლებების პროგრამის დირექტორს, თამარ ონიანს, რომელიც საქმიანობას უკვე საია-ს თავმჯდომარის პოზიციიდან გააგრძელებს.

დიდი მადლობა ყველა გულშემატკივარს, პარტნიორს, ჟურნალისტებს.
წარმატებებს ვუსურვებ საია-ს და მის ახალ თავმჯდომარეს. საია-ში ვრჩები გამგეობის წევრად და ორგანიზაციის მუდმივ გულშემატკივრად," — წერს საია-ს ყოფილი თავმჯდომარე ნონა ქურდოვანიძე.