"დიპლომატიური პასპორტებისთვის უვიზო მიმოსვლა უკვე შეჩერებულია. მეც, როცა გახლდით ვიზიტით ბულგარეთში, ავიღე ვიზა", — ამის შესახებ ბრიფინგზე ოცნების პარლამენტის თავმჯდომარემ, შალვა პაპუაშვილმა ევროკომისიის ანგარიშსა და უვიზო რეჟიმის სავარაუდო გაუქმებაზე საუბრისას თქვა. მისი თქმით, "ბრიუსელი ვიზას წარმოაჩენს, როგორც წყევლას".

"თავად უვიზო მიმოსვლის შეჩერების ეტაპებზე და ა.შ. რაც მიდის შანტაჟი საქართველოს წინააღმდეგ, სიმართლე გითხრათ ცოტა არასერიოზულია ის, რაც ჩვენ გვესმის. მთავარი მუქარა რაც არის, რომ დიპლომატიურ პასპორტებს უვიზო მიმოსვლას შეუჩერებენ. ეს გადაწყვეტილება ჩვენ ვიცოდით, რომ დიდი ხნით ადრე არის მიღებული და უკვე შეჩერებული არის. ვიზას იღებენ ის პირები, ვისაც აქვთ დიპლომატიური პასპორტი. მეც, როცა გახლდით ვიზიტით ბულგარეთში, ავიღე ვიზა. ისევე როგორც ვიზა ავიღე, როცა ბრიტანეთში წავედი ვიზიტით, ირლანდიაში წავედი ვიზიტით. ესაა მთელი პრობლემა, ბრიუსელი ვიზას წარმოაჩენს, როგორც წყევლას, წყევლა უნდა იყოს ვიზის აღება, ანუ დაწყევლილები ვართ ირლანდიისგან, ბრიტანეთისგან, აშშ-სგან, თუ რა ხდება? არის ვიზის საჭიროება? — ავიღებთ ვიზას.

ვისაც სჭირდება რომელიმე ქვეყანაში წასვლა,ვისაც აქვს ამის საფუძველი, არავისთვის პრობლემა არ ყოფილა ვიზის აღება არასდროს," — განაცხადა "ოცნების" პარლამენტის თავმჯდომარემ, შალვა პაპუაშვილმა.