გირჩის ერთ-ერთი ლიდერი, იაგო ხვიჩია აცხადებს, რომ 20 ივნისის აქციების შემდეგ, როცა ქართულმა ოცნებამ პროპორციული საარჩევნო სისტემის პირობა დადო, გიორგი გახარიას გადადგომის მოთხოვნის მხარდაჭერა მისი მხრიდან არასწორი იყო. ამის შესახებ მან გია გაჩეჩილაძის გადაცემა "უცნობის კიდობანში" ისაუბრა. გაჩეჩილაძემ მას ჰკითხა, გაუკეთებია თუ არა საჯარო სივრცეში ისეთი განცხადება, რომელიც შემდეგ უნანია.

"ზოგადად, ბევრი შეცდომა დამიშვია, მათ შორის, რაღაცა მითქვამს და მერჩივნა, რომ არ მქონოდა ნათქვამი. იდეაში, ეგრევე ბოდიშს ვიხდი, თუ მივხვდი, რომ ეგეთი სიტუაციაა, მათ შორის, Facebook-ზეც მომიხდია ბოდიში. პოლიტიკურად... არსად მითქვამს, მაგრამ ვიტყვი. ბევრს არ მოეწონება ეს ამბავი, მაგრამ თავის დროზე, როდესაც ბიძინამ პროპორციული არჩევნები დათმო, იყო 2 თუ 3 მოთხოვნა აქციის. პროპორციული არჩევნები იყო მთავარი მოთხოვნა და გახარიას გადადგომა. ბიძინამ რომ ეს დათმო, მას მერე აქციამ ისევ დაუჭირა მხარი გახარიას გადადგომას. მაშინ ვფიქრობდი, რომ არ უნდა დამეჭირა მხარი ამისთვის, იმიტომ რომ მნიშვნელოვანი იყო დათმობილი. მაგრამ რაღაცნაირად ბოლომდე ვერ მივიღე ეს გადაწყვეტილება და გირჩმა მაშინ დავუჭირეთ ორივე მოთხოვნას მხარი. მალე მივხვდი, რომ არასწორი იყო, იმიტომ რომ უფრო მნიშვნელოვანი დაიდო, მაგრამ უკვე მხარდაჭერილი იყო. ეს მახსოვს, რომ ახლა მაგას არ გავაკეთებდი. როცა მნიშვნელოვან მოთხოვნას გითმობენ ფიზიკურად, შედარებით არამნიშვნელოვანი ან ძალიან არამნიშვნელოვანი მოთხოვნები... მერე გამოიყენა ეს ქართულმა ოცნებამ, არ დამიფასესო, ამის მერე აქციები არ შეწყვიტესო, რაღაცაო. მე ყველაზე ნაკლებად მეხებოდა, თუ დავუფასე კიარა, მარტო მე ვიცავ იმას, ქართული ოცნების წევრები არ იცავენ ბიძინას ამ იდეას და მე ვიცავ", — თქვა ხვიჩიამ.

2019 წლის 20 ივნისს რამდენიმე ათეულმა ათასმა ადამიანმა თბილისში რუსი დეპუტატის ჩამოსვლა და საქართველოს პარლამენტის შენობაში, პარლამენტის თავმჯდომარის სკამზე მისი დაჯდომა გააპროტესტა. ისინი პარლამენტის თავმჯდომარის, ირაკლი კობახიძის გადადგომასაც ითხოვდნენ. აქცია სპეცრაზმმა გაფრთხილების გარეშე, გვიან ღამით, ძალის გადამეტებით დაშალა. დაშავდა ათეულობით მოქალაქე, მათ შორის ორმა დაკარგა თვალი, კიდევ რამდენიმემ — მხედველობა. ამის შემდეგ აქციები გაგრძელდა, ირაკლი კობახიძემ კი თანამდებობა დატოვა. პარლამენტთან შეკრებილების მთავარ მოთხოვნებს შორის იყო სრულად პროპორციული საარჩევნო სისტემა და იმჟამინდელი შინაგან საქმეთა მინისტრის, გიორგი გახარიას გადადგომა. ივანიშვილმა პროპორციულის პირობა დადო, თუმცა ცვლილებების პროექტი რამდენიმე თვის შემდეგ ქართული ოცნების დეპუტატებმა ჩააგდეს, გახარია კი პრემიერმინსტრი გახდა.