სამოქალაქო მოძრაობა Black Lives Matter ("შავკანიანთა სიცოცხლე მნიშვნელოვანია") 2021 წლის ნობელის პრემიაზე, მშვიდობის დარგში, ნორვეგიელმა პარლამენტარმა, პეტერ აიდემ, წარადგინა.

აიდეს თქმით, BLM, რომელიც მსოფლიოში უდიდეს ძალად ჩამოყალიბდა, "რასობრივი უთანასწორობის შესახებ ცნობიერების ამაღლებას ემსახურება" და აგრძელებს ისეთი საზოგადოებრივი აქტივიზმის მემკვიდრეობას, როგორიც აშშ-ში "სამოქალაქო უფლებების მოძრაობა", სამხრეთ აფრიკაში კი ანტიაპარტეიდული მოძრაობა იყო. აღსანიშნავია, რომ ორივე მოძრაობის სულისჩამდგმელებს ასევე აქვთ ნობელის პრემია მიღებული მშვიდობის დარგში: მარტინ ლუთერ კინგმა პრიზი 1964 წელს, ალბერტ ლუთულიმ 1960 წელს, ნელსონ მანდელამ კი 1993 წელს მიიღო.

"ნობელის პრემიის კომიტეტისთვის უჩვეულო ნამდვილად არაა (რასობრივ) უთანასწორობასთან ბრძოლასა და მშვიდობას შორის კავშირის დანახვა", — აღნიშნავს აიდე, რომელიც ნორვეგიის მემარცხენე სოციალისტურ პარტიას წარმოადგენს, — "სამართლის გარეშე მშვიდობა ვერ იქნება".

პრესტიჟულ პრემიაზე წარდგენას გამოეხმაურნენ მოძრაობის ლიდერებიც.

"მსოფლიოს ისტორიაში ჩვენ უდიდესი საზოგადოებრივი მოძრაობა ვართ. დღეს ჩვენ ნობელის პრემიაზე წარგვადგინეს მშვიდობის დარგში. ხალხი იღვიძებს და მოქმედებას იწყებს, რათა აღადგინოს რასობრივი სამართლიანობა, ბოლო მოუღოს ეკონომიკურ უთანასწორობას, რასისტულ გარემოსა და თეთრკანიანთა უპირატესობას. ჩვენ მხოლოდ ვიწყებთ", — აცხადებს BLM ტვიტერზე.

ფოტო: Maddie Meyer / Getty Images

"შავკანიანთა სიცოცხლე მნიშვნელოვანია" 2013 წელს დაფუძნდა, თუმცა მსოფლიოსათვის მოძრაობის საქმიანობა გასულ წელს გახდა მეტად ცნობილი, როცა ჯორჯ ფლოიდის სიკვდილის შემდეგ აშშ-ში მასშტაბური დემონსტრაციები დაიწყო.

გასულ წელს ნობელის პრემია მშვიდობის დარგში გაეროს საკვების მსოფლიო პროგრამამ მიიღო.