ქართული ოცნების პარლამენტის ბიუროს 4 მარტს გამართულ სხდომაზე ოცნების პარლამენტის თავმჯდომარემ, შალვა პაპუაშვილმა განაცხადა, რომ არსებობს საკანონმდებლო წინადადება ლგბტ მარშების და "შესაბამისი ფერადი ნივთების აკრძალვის შესახებ", რომელიც განსახილველად პარლამენტის ადამიანის უფლებათა კომიტეტს გადაეცემა.

"არის საკანონმდებლო წინადადება ლგბტ მარშების და შესაბამისი ფერადი ნივთების აკრძალვის შესახებ.

აღნიშნული წინადადება გადაეცემა ადამიანის უფლებათა კომიტეტს," — თქვა პაპუაშვილმა.

აღნიშნული წინადადების დოკუმენტი პარლამენტის საიტზე ჯერჯერობით ატვირთული არ არის.

შეგახსენებთ, 2024 წლის 17 სექტემბერს, "ოცნების" პარლამენტმა "ოჯახური ღირებულებებისა და არასრულწლოვანის დაცვის შესახებ" ჰომოფობიური კანონპროექტი მიიღო.

კანონპროექტის თანახმად, ქორწინება განისაზღვრება, როგორც "ოჯახის შექმნის მიზნით ქალისა და მამაკაცის ნებაყოფლობითი კავშირი, რომელიც საქართველოს კანონმდებლობით დადგენილ მოთხოვნებს აკმაყოფილებს", ხოლო "დაუშვებელია იმ ადამიანის მიერ არასრულწლოვანის შვილად აყვანა, რომელიც თავს არცერთ ბიოლოგიურ სქესს არ მიაკუთვნებს ან თავისი ბიოლოგიური სქესისგან განსხვავებულ სქესს მიაკუთვნებს ანდა მისი სექსუალური ორიენტაცია ჰეტეროსექსუალობის კატეგორიას არ განეკუთვნება".