ბაზისბანკი, ქართული კულტურის მხარდამჭერი პროექტების ფარგლებში, განაგრძობს თეატრალური სივრცე — თოჯინების სახლის გენერალურ სპონსორობას.

თოჯინების სახლი არის მრავალფუნქციური კულტურულ-საგანმანათლებლო სივრცე, თანამედროვე თეატრალური გარემო, რომელიც განსხვავებული კონცეფციის წარმოდგენებს სთავაზობს ნებისმიერი თაობის მაყურებელს. ცნობილი კლასიკური თუ თანამედროვე დრამატურგიის პერსონაჟები წარმოდგენილნი არიან თოჯინებისა და საგნების სახით, სხვადასხვა დეტალის მხატვრული დამუშავებით მიიღება სრულიად განსხვავებული ეფექტი. გარდა თოჯინებისა და საგნების თეატრისა, სივრცე განკუთვნილია საზოგადოებისთვის ცნობილი ადამიანებისთვის, სადაც იმართება შემოქმედებითი საღამოები, კონცერტები და სალონური შეხვედრები.

დამოუკიდებელი თეატრი თოჯინების სახლი ერთ-ერთი მნიშვნელოვანი მოვლენაა თოჯინური ხელოვნებისა და მთლიანად დარგის განვითარებისთვის. ამ განსხვავებული თეატრალური გარემოს შექმნის იდეა და ინიციატივა ეკუთვნის რეჟისორ ნიკა საბაშვილს. მისი შექმნის მიზანია, თეატრის სპექტაკლები შეესაბამებოდეს, როგორც მოზარდი, ისე უფროსი თაობის ინტერესებს და მათ ესთეტიკურ წარმოდგენებს.

თეატრში დასადგმელად ირჩევა ნაწარმოებები, რომელთა თემები დღესაც აქტუალურია, ეხმიანება თანამედროვეობას და გამოირჩევა მაღალმხატვრული ღირებულებით.

ბაზისბანკისა და თოჯინების სახლის თანამშრომლობის მთავარი მიზანია, საზოგადოებისთვის შექმნილი კულტურულ-საგანმანათლებლო სივრცით, საქართველოში ახალი მხატვრული ტენდენციების დანერგვა და თოჯინების თეატრის პოპულარიზაცია.

ამჟამად, აქტიური სარეპეტიციო პროცესი მიმდინარეობს მორიგი პრემიერების სადემონსტრაციოდ. თოჯინების სახლში, ნიკოლოზ საბაშვილის რეჟისორობით, ორი სპექტაკლის პრემიერა იგეგმება — მიხეილ ჯავახიშვილის "ჯაყოს ხიზნები" და ნიკო ლორთქიფანიძის "ტრაგედია უგმიროდ". "ჯაყოს ხიზნები". როგორც ერთობლივი კოპროდუქცია, საქართველოს თოჯინების პროფესიულ სახელმწიფო თეატრების გაერთიანებასთან თანამშრომლობით იდგმება.

თოჯინების სახლთან ერთად, ბაზისბანკი არის კოტე მარჯანიშვილის სახელობის თეატრის, სანდრო მრევლიშვილის სახელობის თეატრისა და თოჯინების თეატრების გაერთიანების გენერალური სპონსორი, რომელიც მხარს უჭერს ქვეყნის მასშტაბით არაერთი კულტურული ღონისძიების განხორციელებას.