23 ივლისს, "დინამო არენას" სტადიონზე ამერიკელი პოპ და რიტმ-ენდ-ბლუზ მომღერალი ჯასტინ ტიმბერლეიკი საქართველოში კონცერტს გამართავს. ინფორმაციას "ბლექს სი არენა" ავრცელებს.

"23 ივლისს, საქართველო Starring Georgia-ს ფარგლებში მსოფლიო სუპერვარსკვლავს Justin Timberlake-ს უმასპინძლებს.

Justin Timberlake ჩვენი საუკუნის ერთ-ერთი უდიდესი პოპვარსკვლავია, რომელმაც მთელი თავისი კარიერა შემოქმედებით ქარიშხალში გაატარა — Disney-ს სტუდიაში დაწყებული კარიერა 90-იანი წლების სენსაციად ქცეულ NSYNC-ში გაგრძელდა, ხოლო ახალი საუკუნის მიჯნაზე ახალი ვარსკვლავის დაბადება ვიხილეთ, რომელიც დღესაც ისე ანათებს, როგორც ყოველთვის.

10 გრემის ჯილდო, ოსკარის ნომინაცია, ათობით მილიონი გაყიდული ალბომი და მსოფლიოს ყველა კუთხეში გავსებული საკონცერტო დარბაზები Justin Timberlake წარმატების გასაზომად ალბათ საკმარისია, მაგრამ მისი კარიერა უფრო მეტია, ვიდრე რიცხვები. მისი მრავალწლიანი კარიერა კვეთს მუსიკის საზღვრებს, რადგან მან გვაჩვენა, რომ შეუძლია იყოს ნიჭიერი მოცეკვავე, საინტერესო მსახიობი და ფილანთროპი, რომელიც მუდმივად რჩება გართობის ინდუსტრიის მთავარ სახედ.

Starring Georgia-ს ფარგლებში ქართველი მსმენელი უკვე განებივრებულია მსოფლიო დონის ვარსკვლავებით, მაგრამ Justin Timberlake პოპ მუსიკის ისტორიის კიდევ სხვა ფურცელია, რომელიც აუცილებლად უნდა გამხდარიყო ჩვენი პროექტის ნაწილიც", — ნათქვამია გავრცელებულ ინფორმაციაში.

მათვე ცნობით, ბილეთების გაყიდვა 8 აპრილს, 12;00 საათიდან დაიწყება.