ამერიკელი მსახიობი ელენ პომპეო პოპვარსკვლავ ტეილორ სვიფტთან თავისი მეგობრობის შესახებ ჰყვება. გავრცელებული ცნობით, სვიფტმა სწორედ პომპეოს ცნობილი პერსონაჟის, მერედით გრეის (გრეის ანატომია), პატივსაცემად დაარქვა სახელი თავის ერთ-ერთ კატას. მსახიობი გამოჩნდა ტეილორის სიმღერა Bad Blood-ზე გადაღებულ ვიდეოკლიპშიც.

სულ ახლახან კი, პომპეო ერთ-ერთ ტელეგადაცემაში იყო სტუმრად, სადაც გაიხსენა, რომ პოპვარსკვლავი სწორედ Bad Blood-ის კლიპის გადაღებებზე გაიცნო და მაშინვე მოიხიბლა მისი ხელგაშლილობით.

"იმ დროისათვის მე და ჩემი ქმარი მოხალისეობრივ სამუშაოს ვასრულებდით ლოს-ანჯელესის ბავშვთა საავადმყოფოში", — ჰყვება მსახიობი, — "იქ არაჩვეულებრივი პროგრამები აქვთ, მაგრამ მათ განსახორციელებლად ფული სჭირდებათ. ამიტომ, ტეილორს ვთხოვე, ბავშვთა საავადმყოფოსთვის თანხას ხომ არ გაიღებდი-მეთქი. და იმის მიუხედავად, რომ სულ რაღაც 20 წუთი მიცნობდა, თვალის დაუხამხამებლად გამომიწერა უდიდესი ჩეკი".

ტეილორ სვიფტი, რომელიც მსოფლიოში ყველაზე მდიდარ მუსიკოს ქალად მიიჩნევა და რომლის ქონება $1,6 მილიარდს აღწევს, ყოველთვის აქტიურად იყო ჩართული საქველმოქმედო საქმიანობაშიც.

სხვადასხვა დროს, ბუნებრივი კატასტროფებით თუ კოვიდპანდემიით დაზარალებული ადამიანებისა და მცირე ბიზნესების დასახმარებლად სვიფტმა მილიონობით დოლარი გადარიცხა. ტეილორი ფინანსურად მხარს უჭერს საგანმანათლებლო პროგრამებსა და უფლებადამცველ ორგანიზაციებსაც.

ასევე იხილეთ: