ლელო — ძლიერი საქართველოს ერთ-ერთ ლიდერს, ბადრი ჯაფარიძეს თეა წულუკიანის საგამოძიებო კომისიაზე არმისვლის გამო ბრალდება დღეს ოფიციალურად წაუყენეს. მან პროკურატურის შენობა უკვე დატოვა და ტელევიზიებს კომენტარი მისცა:

"ბრალი წამიყენეს, რაც ე.წ. საგამოძიებო კომისიაზე ჩემს არ მისვლას ეხება. შემდეგი ნაბიჯები რა იქნება პროკურატურის, არ ვიცი, დაველოდოთ. ცხადია, რომ დღევანდელი რეპრესიული რეჟიმი იყენებს პროკურატურას, სასამართლოს ოპონენტების მიმართ ანგარიშსწორებისთვის, აბსოლუტურად პრივატიზებულია პროკურატურაც, სასამართლოც და აუცილებლად გათავისუფლდება ეს ინსტიტუციები, როგორც კი ქართული ოცნება დემოკრატიული გზით ჩამოშორდება ხელისუფლებას", — განაცხადა ბადრი ჯაფარიძემ ჟურნალისტებთან საუბრისას.

გამოძიება სისხლის სამართლის კოდექსის 349-ე მუხლით მიმდინარეობს, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს, აღნიშნული ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.