ოცნების პრემიერმა, ირაკლი კობახიძემ განმარტა, რომ გრიგოლ ლილუაშვილთან მინისტრის მოადგილეების დანიშვნის პრეროგატივაზე ვერ შეთანხმდნენ.

"რამდენიმე დღის წინ საპარლამენტო უმრავლესობასთან კონსულტაციების საფუძველზე მივიღეთ გადაწყვეტილება, საქართველოს რეგიონული განვითარების სამინისტროს შექმნის შესახებ. გარდა ამისა, განვაცხადეთ, რომ აღნიშნულ თანამდებობას ბატონი გრიგოლ ლილუაშვილი დაიკავებდა. გასული დღეების განმავლობაში გვქონდა კონსულტაციები გრიგოლ ლილუაშვილთან და გაირკვა, რომ ჰქონდა განსხვავებული მიდგომები სამინისტროს საქმიანობის პრინციპებთან, მათ შორის, სამინისტროში გასატარებელ საკადრო პოლიტიკასთან დაკავშირებით. აქედან გამომდინარე, მივიღეთ გადაწყვეტილება, რომ ბატონი გრიგოლ ლილუაშვილი აღარ დაიკავებს რეგიონული განვითარების მინისტრის თანამდებობას.

... ყველაზე მნიშვნელოვანი ალბათ იყო მინისტრის მოადგილეების საკითხი. როგორც მოგეხსენებათ, კანონის თანახმად პრემიერმინისტრის მიერ ინიშნება მინისტრის მოადგილეები, მინისტრის წარდგინებით. აქ იყო განსხვავებული შეხედულებები. აქ საქმე არ ეხებოდა მხოლოდ პერსონებს, იყო განსხვავებული შეხედულებები, რომლებიც დაკავშირებული იყო კონკრეტული კადრების მიერ სამინისტროს ფუნქციების ამა თუ იმ ფორმით შესრულებასთან. თუმცა ჩვენ გვქონდა აბსოლუტურად ჯანსაღი დიალოგი ამ საკითხთან დაკავშირებით და ერთობლივად მივიღეთ ეს გადაწყვეტილება", — განაცხადა კობახიძემ ბრიფინგზე, სადაც რეგიონული განვითარების მინისტრობის კანდიდატად გრიგოლ ლილუაშვილის ნაცვლად კახაბერ გულედანი წარადგინა.

საქართველოს რეგიონული განვითარების მინისტრის თანამდებობას გრიგოლ ლილუაშვილი აღარ დაიკავებს. ამის შესახებ ირაკლი კობახიძემ დღეს გამართულ ბრიფინგზე განაცხადა. მისი თქმით, ლილუაშვილის ნაცვლად მინისტრი კახაბერ გულედანი დაიკავებს.

აღსანიშნავია, რომ გრიგოლ ლილუაშვილი აქამდე სუს-ის ხელმძღვანელის პოზიციას იკავებდა. ამ პოზიციაზე ლილუაშვილი ანრი ოხანაშვილმა ჩაანაცვლა.