საქართველოს მე-5 პრეზიდენტის, სალომე ზურაბიშილის თქმით, "ცესკოში შეტანილი ცვლილებები არის "კარუსელის" ლეგალიზება".

"ცესკოში შეტანილი ცვლილებები, რომლებიც პირდაპირ აღიარებაა იმის, თუ რა ფორმით მიდიოდა [არჩევნები], რომელიც იყო ის, რომ არ სთხოვდნენ ადამიანებს პირადობის დამტკიცებას/დადასტურებას და დღეს, უკვე მიიღეს ცვლილება, რომელიც არის ამ "კარუსელის" ლეგალიზება.

ეს მაჩვენებელია იმის, რომ ძალიან ნერვიულობენ ერთის მხრივ და ემზადებიან არჩევნებისთვის — ვისაც აქვს ეჭვი, რომ იძულებული გახდებიან რაღაც მომენტში, რომ დანიშნონ საპარლამენტო არჩევნები, სჯობს უყუროს იმას, თუ რას აკეთებენ, რამდენად ემზადებიან.
იციან, რომ მოუწევთ არჩევნების დანიშვნა და ამისთვის ყველა კუთხით, ეს არის მაქსიმალურად ყველაფრის დაზღვევა, მაგრამ ესეც არ გამოუვათ.

ეს ნიშანია ჩვენთვის, წინააღმდეგობის პლატფორმისთვის, რომ ჩვენც მზად უნდა ვიყოთ და მზადყოფნა ნიშნავს პირველ რიგში იმას, რომ დამკვირვებლების ჯარი იყოს მომზადებული და დღესვე დავიწყოთ ამის მზადება. ეს არის სწორი გზა და ჩვენ ყველანი ერთად ამისთვის უნდა ვემზადებოდეთ," — თქვა საქართველოს მე-5 პრეზიდენტმა, სალომე ზურაბიშვილმა.

3 აპრილს ცენტრალურმა საარჩევნო კომისიამ ცვლილები შეიტანა შემდეგ დადგენილებაში: "კენჭისყრის ელექტრონული საშუალებების გამოყენებით ჩატარების წესისა და პირობების განსაზღვრის შესახებ" და ფოტო-ვიდეო გადაღების დადგენილება.

2023 წლის 6 თებერვლის დადგენილებაში "კენჭისყრის ელექტრონული საშუალებების გამოყენებით ჩატარების წესისა და პირობების განსაზღვრის შესახებ" ახალი ცვლილებით დაუშვებელია კენჭისყრის ოთახში ამომრჩევლის გადაადგილების ფიზიკურად შეფერხება,
ამომრჩევლის პირადობის დამადასტურებელი დოკუმენტის ჩვენების მოთხოვნა, მათ შორის, გამორთმევა.

ასევე ცესკოს დადგენილებაში ცვლილების მიხედვით, ერთი და იგივე პრესისა და მასობრივი ინფორმაციის სხვა საშუალების წარმომადგენელს უფლება აქვს, ერთ საარჩევნო უბანზე ფოტოვიდეოგადაღება ერთხელ აწარმოოს არაუმეტეს 10 წუთისა.

ცესკოს ახალი დადგენილებით, ფოტო-ვიდეოგადამღები აპარატის ადგილმდებარეობას კომისიის თავმჯდომარე გადაწყვეტს. ფოტო-ვიდეოგადამღები აპარატი 3 მეტრის დაშორებით უნდა იყოს ხმის მიმცემი კაბინისგან და გადასაღები სუბიექტისგან (როდესაც კენჭისყრის შენობა არ იძლევა 3 მეტრიანი დისტანციის დაცვის საშუალებას).