"ოცნების" პრემიერმა, ირაკლი კობახიძემ აშშ-სთან ურთიერთობების განვითარების შესაძლო სცენარებზე ისაუბრა.

"ჩვენ მშვიდად ველოდებით მოვლენების განვითარებას. ჩვენ, არჩევნები როცა ტარდებოდა აშშ-ში, რა თქმა უნდა, უარეს სცენარზეც გვქონდა გათვლილი და ეს უარესი სცენარი იქნებოდა იგივე, ასე ვთქვათ, მმართველობის დარჩენა ხელისუფლებაში, რაც მანამდე მოქმედებდა — ამ სცენარისთვისაც კი ვიყავით ჩვენ მზად, აბსოლუტურად მზად! ვერც ამ სცენარის პირობებში ვერ შეარყევდა ვერავინ ჩვენი ქვეყნის დამოუკიდებლობას.

ახლა უკვე მნიშვნელოვანი შედეგი მოიტანა ტრამპის არჩევამ. მთავარი შედეგი არის ის, რომ საზოგადოებამ ძალიან ბევრი რამ სხვანაირად გაიგო, უკვე ხედავთ, რომ ახალი ხელისუფლება აშშ-ში საუბრობს იგივეს წინა ხელისუფლებაზე, რაზეც ჩვენ ვსაუბრობდით 4 წლის განმავლობაში. ეს უკვე ძალიან ხელშესახები შედეგია, ძალიან მნიშვნელოვანი შედეგია.

რაც შეეხება სამომავლო განვითარებას, ვნახოთ! ჩვენ ყველაფრისთვის ვართ მზად. არის ორი შესაძლო სცენარი: ერთი სცენარია, რომ ტრამპი ამარცხებს "დიფ სთეითს", ამ შემთხვევაში ეს არის ჩვენთვის, რა თქმა უნდა, კარგი სცენარი, რაც ხელს შეუწყობს ურთიერთობების გაჯანსაღებას საქართველოსა და აშშ-ს შორის, მაგრამ თუ ტრამპი ვერ დაამარცხებს "დიფ სთეითს", ამ შემთხვევაში არის რისკი იმისა, რომ ისევე გაგრძელდეს მოვლენების განვითარება, როგორც ეს გრძელდებოდა გასული 4 წლის განმავლობაში.

ჩვენ ორივე სცენარისთვის ვართ მზად, ვერცერთი სცენარის პირობებში ვერავინ ვერ შეარყევს ქართული სახელმწიფოს სუვერენიტეტს და დამოუკიდებლობას", — განაცხადა ირაკლი კობახიძემ აშშ-სთან ურთიერთობაზე.