"ანრი ოხანაშვილი პატრიოტიზმთან ერთად არის გამორჩეული კვალიფიკაციის მქონე ადამიანი. მინდა კმაყოფილება გამოვხატო პრემიერის გადაწყვეტილებასთან დაკავშირებით, რომ სახელმწიფო უსაფრთხოების სამსახურის უფროსად წარდგენილია მისი კანდიდატურა", — ამის შესახებ ოცნების პარლამენტის თავმჯდომარემ შალვა პაპუაშვილმა განაცხადა.

"მინდა კმაყოფილება გამოვხატო პრემიერ-მინისტრის გადაწყვეტილებასთან დაკავშირებით დაკავშირებით, რომ სახელმწიფო უსაფრთხოების სამსახურის უფროსად წარდგენილ იქნა ანრი ოხანაშვილი.

რა თქმა უნდა, პარლამენტი მისთვის მშობლიური კერაა, ის თავის გამორჩეულ პატრიოტიზმთან ერთად არის გამორჩეული კვალიფიკაციის მქონე პროფესიონალი, რომელმაც წლების განმავლობაში საპარლამენტო საქმიანობის დროს დაამტკიცა აბსოლუტური უზადობა მისი იურიდიული ცოდნისა. იურიდიულ საკითხთა კომიტეტი მისი ხელმძღვანელობის დროს იყო გამორჩეული კომიტეტი პროფესიონალიზმით. მისი თვისებები - პატრიოტიზმი და პროფესიონალიზმი არის ის თვისებები, რომელიც მნიშვნელოვანია ისეთი სტრუქტურისთვის, როგორიც არის სახელმწიფო უსაფრთხოების სამსახური. დარწმუნებული ვარ, რომ თითოეული თანამშრომელი სახელმწიფო უსაფრთხოების სამსახურისა იქნება განსაკუთრებულად ამ მხრივ მოწადინებული, რომ ბატონი ანრი ოხანაშვილის ხელმძღვანელობით კვლავ იყვნენ საქართველოს სახელმწიფოს უსაფრთხოების სადარაჯოზე", — განაცხადა შალვა პაპუაშვილმა.

შეგახსენებთ, რომ ოცნების 2 აპრილს ოცნების ხელისუფლების პრემიერმა, ირაკლი კობახიძემ ანრი ოხანაშვილი, რომელიც ოცნების მინისტრთა კაბინეტში იუსტიციის მინისტრის პოსტს იკავებდა, სახელმწიფო უსაფრთხოების სამსახურის უფროსად წარადგინა.

მანამდე სუს-ის ხელმძღვანელის თანამდებობას გრიგოლ ლილუაშვილი იკავებდა. მისი წერილობით მიმართვა, სადაც ის სუს-ის უფროსის უფლებამოსილების ვადამდე შეწყვეტას ითხოვს, პარლამენტის საპროცედურო საკითხთა და წესების კომიტეტმა მხარი დაუჭირა. საკითხი პარლამენტის ბიუროს სხდომაზე გავა, შემდეგ კი, დასკვნის პროექტს სესიაზე წარადგენენ.

საკადრო ცვლილების ფარგლებში, ირაკლი კობახიძემ ლილუაშვილი ახლად შექმნილი რეგიონული განვითარების მინისტრად წარადგინა.