ოცნების პრემიერმინისტრმა ირაკლი კობახიძემ საქართველოში საფრანგეთის ელჩი გააკრიტიკა და განაცხადა, რომ ის არღვევს ვენის კონვენციას. კობახიძემ ასევე დასძინა, რომ დღეს "საფრანგეთს ურეიტინგო ხელისუფლება ჰყავს".

"მე მგონი, საფრანგეთის ელჩმა უნდა მიხედოს, პირველ რიგში, თავის ქვეყანას. თქვენ ხედავთ, რა ხდება საფრანგეთში — არის ერთ-ერთი საპრეზიდენტო კანდიდატი [მარინ ლე პენი], რომელსაც აქვს გამარჯვების სერიოზული შანსები და მას აღუკვეთეს არჩევნებში მონაწილეობა.

ამ დროს, ჩვენთან მიმართებით აქვთ შენიშვნები ისეთ საკითხებზე, რაც საერთოდ არავითარ შენიშვნას არ იმსახურებს. თვითონ საკუთარ საქმეებს მიხედონ. ჩვენ არ ვაკეთებთ ხოლმე განცხადებებს, თუ რა ხდება საფრანგეთში. ყველამ პატივი უნდა სცეს სხვა ქვეყნის სუვერენიტეტს, დამოუკიდებლობას და არავინ არ უნდა ჩაერიოს სხვა ქვეყნის საქმეებში. მით უმეტეს, როცა ამას აკეთებს დიპლომატი, ელჩი — ეს არის ვენის კონვენციის პირდაპირი დარღვევა. ჩვენი ელჩები ამას არ აკეთებენ, მიუხედავად იმისა, რომ საფრანგეთში არაერთი მანკიერება ვიხილეთ მთელი ამ წლების განმავლობაში.

დღეს აბსოლუტურად ურეიტინგო ხელისუფლება ჰყავს საფრანგეთს. ამის მიუხედავად, ჩვენ არ ვსაუბრობთ ამ თემებზე, ნურც ისინი ჩაერევიან ჩვენი ქვეყნის დამოუკიდებლობაში, მით უმეტეს, ნუ გააკეთებენ ამას ვენის კონვენციის დარღვევით" — განაცხადა ირაკლი კობახიძემ.

შეგახსენებთ, რომ ულტრამემარჯვენე პარტია "ეროვნული გაერთიანების" ლიდერ მარინ ლე პენს პარიზის სასამართლომ 2027 წლის საფრანგეთის საპრეზიდენტო არჩევნებში მონაწილეობა აუკრძალა და 4 წლით თავისუფლების აღკვეთა მიუსაჯა. აქედან 2 წელი პირობითი სასჯელი აქვს, 2 წელი — ელექტროსამაჯურით. ამას გარდა მას 100 000 ევროს გადახდაც დაეკისრა.

მარინ ლე პენს 2027 წლის საპრეზიდენტო არჩევნებში მონაწილეობა აეკრძალა