ვენესუელაში მუშაობა დაიწყო ეროვნული ასამბლეის ახალმა მოწვევამ, სადაც უმრავლესობას პრეზიდენტი ნიკოლას მადუროს სოციალისტური პარტია წარმოადგენს. აქამდე ქვეყნის პარლამენტი იყო ერთადერთი პოლიტიკური ორგანო ქვეყანაში, რომელსაც მადურო ვერ აკონტროლებდა.

დეკემბერის საპარლამენტო არჩევნებს ოპოზიციამ ბოიკოტი გამოუცხადა. მადუროს მხარდამჭერების კოალიციამ კი 277 მანდატიდან 256 მოიპოვა მოიპოვეს.

ოპოზიცია არჩევნების შედეგებს არ აღიარებს. როგორც BBC წერს, ხუან გუაიდომ ფიცის დადების ცერემონია წინა მოწვევის პარლამენტარებთან ერთად გამართა. ჯერ კიდევ 26 დეკემბერს მან განაცხადა, რომ ძველი ასამბლეა საკანონმდებლო საქმიანობას გააგრძელებდა.

ვენესუელაში პოლიტიკური კრიზისი 2019 წლის იანვარში გამწვავდა, როცა ოპოზიციის მიერ კონტროლირებადმა პარლამენტმა ხუან გუაიდო დროებით პრეზიდენტად გამოაცხადა. მისი ლეგიტიმურობა 50-მდე ქვეყანამ აღიარა, მათ შორის საქართველომ.

გუაიდო და მისი მხარდამჭერები ამბობენ, რომ 2018 წლის საპრეზიდენტო არჩევნები, რომლის შედეგადაც მადურო ხელისუფლებაში დარჩა, გაყალბდა. ოპოზიციის ლიდერის სიტყვებით, რადგან არჩევნები არასამართლიანი და არადემოკრატიული იყო, შესაბამისად პრეზიდენტის პოსტიც თავისუფალი დარჩა. მან კონსტიტუცია მოიშველია, რომლის თანახმადაც, პარლამენტის სპიკერი დროებითი პრეზიდენტი ხდება.

მიუხედავად იმისა, რომ გუაიდოს ლეგიტიმურობა ქვეყნების დიდმა ნაწილმა აღიარა, მადურომა შეინარჩუნა გავლენა ძალოვან სტრუქტურებზე, საარჩევნო ორგანოებსა და სასამართლოების დიდ ნაწილზე. ამასთან, მას მხარს უჭერენ რუსეთი და ჩინეთი.

ოპოზიციის უმრავლესობამ გადაწყვიტა ბოიკოტი გამოეცხადებინა მადუროს არჩევნებისთვის, რადგან მიაჩნდათ, რომ ის თავისუფალი და სამართლიანი ვერ იქნებოდა. გარდა ამისა, ასამბლეამ ოპოზიციის ხელმძღვანელობით საკანონმდებლო ვადა გაიხანგრძლივა, სანამ ქვეყანაში დემოკრატია არ იქნება აღდგენილი. მათ ფიცის დადების ცერემონია ეროვნული ასამბლეის კედლებს გარეთ ჩაატარეს, სადაც სპიკერად კვლავ ხუან გუაიდო აირჩიეს.

"ჩემი პირველი მიმართვა მიმართულია მადუროსკენ. ჩვენ არ ვდგავართ უბრალოდ სახელმწიფოს ინსტიტუტებისთვის და პარლამენტთან ლეგიტიმური დიალოგისთვის. ჩვენ აქ ჩვენი ხალხის დასაცავად ვდგავართ", — განაცხადა გუაიდომ.

მადუროს პარლამენტის თავმჯდომარემ, ხორხე როდრიგესმა ტვიტერზე დაწერა, რომ ეროვნულ ასამბლეაში დაბრუნდა ხალხი, რათა დაიბრუნოს მიტაცებული ძალაუფლება.