სომხეთის დედაქალაქ ერევანში ქვეყნის პრემიერმინისტრის, ნიკოლ ფაშინიანის გადადგომის მოთხოვნით გამართულ აქციაზე პოლიციამ აქციის 69 მონაწილე დააკავა. ARMENPRESS-ის ინფორმაციით, მომიტინგეებს სამართალდამცავები ადმინისტრაციულ სამართალდარღვევათა კოდექსით გათვალისწინებული დანაშაულის ჩადენის ბრალდებით აკავებდნენ.

ერევნის ცენტრში რამდენიმე ასეული დემონსტრანტი შეიკრიბა. ისინი ფაშინიანის გადადგომის მოთხოვნით აქციას მთავრობის სახლის წინ მართავდნენ. მომიტინგეები ცდილობდნენ, ფაშინიანი და მისი მთავრობის წევრები შენობაში არ შეეშვათ.

"ნიკოლი მოღალატეა", "სომხეთი ნიკოლის გარეშე", — სკანდირებდნენ ისინი.

პრემიერმინისტრის გადადგომის მოთხოვნით, საპროტესტო აქციებს სხვადასხვა პოლიტიკური პარტიების მიერ შექმნილი გაერთიანება მოძრაობა მამულის გადასარჩენად ატარებს. ისინი მთიანი ყარაბაღის გარშემო მიმდინარე კონფლიქტის შედეგად ტერიტორიების დაკარგვისა და ათასობით ადამიანის დაღუპვის გამო პასუხისმგებლობას ფაშინიანს აკისრებენ.

27 სექტემბერს დაწყებული ომი მთიან ყარაბაღში სომხეთსა და აზერბაიჯანს შორის 9 ნოემბერს მიღწეული შეთანხმების შედეგად დასრულდა. შეთანხმების თანახმად, ყარაბაღის გარშემო მდებარე რაიონები აზერბაიჯანს გადაეცა.

ყარაბაღში ომის დასრულების შესახებ შეთანხმება სომხეთში კაპიტულაციად აღიქვეს, რასაც მოსახლეობის პროტესტი მაშინვე მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. ერევნისგან განსხვავებით, ბაქოში შეთანხმებას სიხარულით შეხვდნენ.

სამმხრივ დოკუმენტს ხელი სომხეთის პრემიერმინისტრმა, ნიკოლ ფაშინიანმა, აზერბაიჯანის პრეზიდენტმა, ილჰამ ალიევმა და რუსეთის პრეზიდენტმა ვლადიმერ პუტინმა მოაწერეს. შეთანხმების მიხედვით, სომხური მხარე აზერბაიჯანს კონფლიქტის ზონაში რამდენიმე ტერიტორიას გადასცემს, მთიან ყარაბაღში ბრუნდებიან დევნილები, კონფლიქტის ხაზის გასწვრივ კი რუსი სამშვიდობოები განლაგდებიან. რა სტატუსი ექნება მთიანი ყარაბაღის რეგიონს, შეთანხმებაში არ წერია.

ფაშინიანი აღნიშნავს, რომ შეთანხმების ხელმოწერის გარდა, სხვა გზა არ ჰქონდა. როგორც ის განმარტავს, გადაწყვეტილება ანალიზის შედეგად მიიღეს.

ამავე თემაზე: