ქეროთს [სტაფილო], ალბათ სულაც არ სურდა 2020 თავში ხვრელით დაეგვირგვინებინა, მაგრამ კანადური თეთრკუდა ირემი შოკისმომგვრელი ამბით გახდა ცნობილი. გასულ კვირას, ის თავის არეში ისრით დაჭრილი იპოვეს.

"რამდენი რამის გადატანა მოუხდა გასულ კვირებში — ისრით მიყენებული ჭრილობიდან, მის ამოღებამდე და მოშუშებამდე. საშინელი ზამთარი ჰქონდა, ვერ წარმომიდგენია როგორ გადარჩა", — თქვა ლი-ენ კარვერმა, ველური ბუნების ფოტოგრაფმა, რომელმაც ეს სამწუხარო ფაქტი აღბეჭდა.

ფოტო: Lee-Anne Carver / The Guardian

კანადის ბუნებრივი რესურსების სამინისტროს თანამშრომლებმა ირემი ისრისგან გაათავისუფლეს. მისი დაძინების ოპერაცია პირველ ცდაზე ჩავარდა, რადგან დამამშვიდებლების პირველი დოზის შემდეგ ირემმა მოძრაობა განაგრძო, თუმცა დამატებითი გამაყუჩებლებით დააძინეს და ისრის მოცილების პროცედურა დაიწყეს.

დასახლებაში მსგავსი ოპერაციის გამოცდილების მქონე ვეტერინარი ვერ გამოინახა, ამიტომ დეტალური ინსტრუქციები სპეციალისტმა სატელეფონო კონსულტაციით გასცა.

ისრის ამოღებას სისხლდენა არ მოჰყოლია და გარანტიები, რომ ცხოველის გამოჯანმრთელების პროცესი უპრობლემოდ ჩაივლიდა, არ არსებობდა. არსებობდა რისკი, რომ გამაყუჩებლებს ფატალური შედეგი გამოეწვია. ჭრილობა დაჩირქებული იყო და ირემს ენა გალურჯებული ჰქონდა.

"მისი სიკვდილის ალბათობა მაღალი იყო, არავითარი გარანტია არ არსებობდა", — აღნიშნა კარვერმა.

ირემი ბუნებაში დააბრუნეს და ფოტოგრაფს რამდენიმე დღის განმავლობაში აღარ უნახავს, ყველაზე უარესის მოლოდინში მის საძებნელად წავიდა და როდესაც ხეზე შემომსხდარი ათამდე ყორანი დაინახა, იფიქრა, რომ ალბათ ირემი მოკვდა, თუმცა ქეროთის კვალი ვერსად ნახა.

მზის ჩასვლისას, იმედგადაწურული სახლში ბრუნდებოდა, როდესაც გზის პირას ირემი შენიშნა და სიხარულისგან შეჰკივლა, ირემი მიუახლოვდა და კარვერს ხელები გაულოკა.

"ვერც კი ვიჯერებ, ბედნიერი ვარ. მასთან ერთად გამოვიარეთ ბნელი დრო და მისი კარგად ყოფნა ჩვენც სიხარულად გვექცა. ის ნამდვილად წლის ირემია", — თქვა ლი-ენ კარვერმა.

მართლაც, რა აღწერს უკეთესად ჩვენს 2020-ს, თუ არა თავში ისრიანი ირემი?