რესპუბლიკური პარტიის ერთ-ერთის ლიდერის, ხათუნა სამნიძის აზრით, არ არის სწორი, როცა ოპოზიცია აკრიტიკებს პარტია მოქალაქეების ლიდერს, ალეკო ელისაშვილს. მისი თქმით, ის ვერ ხედავს პრობლემას იმაში, რომ ელისაშვილმა აირჩია სხვა გზა, რადგან ოპოზიციის შეხვედრებზე მასაც ჰქონდა განსხვავებული აზრები.

"მე არაერთხელ ვთქვი, რომ არ მგონია სწორი ერთმანეთს, განსაკუთრებით ამ ბოლო დროს ალეკოზე თავდასხმა სწორი იყოს და ასეთი კრიტიკა. კი, ის ამბები, რომ შიგნით როცა ვსაუბრობთ, მეც განსხვავებული აზრი მქონია ამ შეხვედრებზე და ამაში პრობლემას ვერ ვხედავ [...] როდესაც მას თავს ესხმიან იმის გამო, რომ მან აირჩია სხვა გზა, მაგალითად ის, რომ რომელიღაცა პუნქტმა შეიძლება უფრო დააკმაყოფილოს, ვიდრე სხვამ, ამ ნაწილში არ მგონია სწორი მისი კრიტიკა, იმიტომ, რომ მან აირჩია თავისი გზა, მაგრამ ჩვენთან ერთად დგას, როგორც ბოიკოტის ნაწილში, ასევე მანდატების ნაწილში, ის არ შესულა პარლამენტში და დღეს დაადასტურა, რომ მე პარლამენტში არ შევალო", — ამბობს სამნიძე გადაცემა რეაქციაში.

TV პირველზე, გადაცემა რეაქციაში, მოქალაქეების ლიდერმა, თქვა, რომ ხელისუფლებისა და ოპოზიციის მოლაპარაკებების მაგიდაზე დასხდომის შემდეგ ლელოს ოფისში განიხილებოდა ოპოზიციის მოქმედების სხვადასხვა სცენარი, მათ შორის მღელვარე ხალხზე "მოჯდომა". სამნიძე ამასაც გამოეხმაურა.

"ვშლით მოლაპარაკებებს და ვართ ქუჩაში, ვეკითხებოდი, მერე რას ვაკეთებთ, რა გეგმა გვაქვს, როგორ ვამარცხებთ ბიძინა ივანიშვილს და როგორ მოვიპოვებთ უკეთეს ქვეყანას. ერთი ვერსია იყო რომ ბაიდენის ადმინისტრაცია შეიცვლება იანვარში და რაღაცა ჩვენ სასიკეთოდ შეიცვლება, ევროპული საქართველოს ხალხი იყო ძირითადად პასუხის გამცემი — ამაზე დავცინეთ, რა თქმა უნდა. მეორე ვერსია იყო, რომ მღელვარება იქნება ისეთი ზამთარი იქნება და უმუშევრობა, სიღატაკე და კორონავირუსი, რომ ხალხი ქუჩაში გამოვარდება, ამაზე ჩვენ გვქონდა საშინელი რეაქცია და ვთქვით, რომ ვისაც ეს უნდა და ვისაც უნდა რომ ამ მღელვარების ტალღას მოაჯდეს ჩვენ ვიქნებით მისი მოსისხლე მტრები", — განაცხადა ელისაშვილმა.

როგორც ხათუნა სამნიძემ აღნიშნა, ის არ ეთანხმება ოპოზიციის შიგნით მიმდინარე საუბრების გარეთ გამოტანას და ამ ნაწილში კოლეგების კრიტიკას უერთდება.

"რაც შეეხება მეორე ნაწილს, სადაც ის კოლეგების ნათქვამზე ლაპარაკობს, ინტერპრეტირებას უკეთებს და ამით ხელს უწყობს სხვა პროცესებს, ამ ნაწილში კი მეც, ჩემს კოლეგებთან ერთად გავაკრიტიკებ და ვიტყვი, რომ არ არის სწორი, როდესაც შიგნით ვსაუბრობთ სხვადასხვა სცენარებზე, სხვადასხვა საშუალებებზე, რა შეიძლება გააკეთოს ოპოზიციამ და ეს საუბარი გარეთ უნდა გამოვიტანოთ, აი ამის მომხრე არ ვარ", — თქვა სამნიძემ რეაქციაში.

ოპოზიციურმა პოლიტიკურმა პარტიებმა მანდატების გაუქმების თაობაზე ცენტრალურ საარჩევნო კომისიას უკვე მიმართეს. მანდატებზე ოფიცილაურად არ მიუმართავს პარტია მოქალაქეებს, პატრიოტთა ალიანსს და გირჩის სხვა ლიდერებს ზურაბ ჯაფარიძის გარდა. 31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიციურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია.

გაიგეთ მეტი:

• ოპოზიციაში არანაირი გეგმა არ არსებობს — ალეკო ელისაშვილი
• პარტიების ნაწილს უნდა, მღვრიე წყალში თევზი დაიჭირონ — ელისაშვილი
• დღეს ვინც იყო პიონერთა სასახლის ეზოში მისული, ისინი ხალხს ატყუებენ — ელისაშვილი ოპოზიციაზე