მოქალაქეების ლიდერმა, ალეკო ელისაშვილმა განაცხადა, რომ ოპოზიციონერი პარტიების მიერ დღეს შეკრება და მანდატებზე უარის სათქმელ განცხადებაზე ხელმოწერა იყო ხალხის მოტყუება.

"ჩემთვის პოლიტიკოსები იყოფიან ასე — არის ხალხი, რომელიც იტყუება, არის ხალხი, რომელიც არ იტყუება. დღეს ვინც იყო პიონერთა სასახლის ეზოში მისული, ისინი ხალხს ატყუებენ. შე დალოცვილო, თან იძახი, მოლაპარაკებებში ვმონაწილეობო, თან იძახი, მანდატებზე უარს ვიტყვიო. იქ კიდე მემორანდუმს აწერენ ხელს, სადაც წერია, რომ ჩვენ ვამბობთ მანდატებზე უარს. უგულავა, ბოკერია, ოქრუაშვილი, ბურჯანაძე რომელ მანდატებზე იძახიან უარს, ასე ხალხის აბუჩად აგდება შეიძლება? ეს არის სირცხვილი და ხალხის მოტყუება, რაც მოაწყვეს", — განაცხადა ალეკო ელისაშვილმა.

მე-10 მოწვევის პარლამენტის პირველი სხდომის პარალელურად ბარიერგადალახული ოპოზიციური პარტიები მოსწავლე ახალგაზრდობის სასახლის ბაღში შეკრებილი არიან, საპარალამენტო მანდატებზე უარს ამბობენ და ამის შესახებ განცხადებას ხელს საჯაროდ აწერენ.

ოპოზიციური პარტიებიდან ადგილზე არ არის ალეკო ელისაშვილი, რომელმაც განაცხადა, რომ არც პარლამენტში შედის და არც განცხადებას აწერს ხელს.

როგორც ნინო ბურჯანაძემ განაცხადა, მემორანდუმი არის სამი ნაწილისგან შემდგარი და შემდეგი შინაარსის:

"პირველი არის ხელმოწერილი დოკუმენტი იმ დეპუტატების მიერ, რომლებიც დე-ფაქტო შესული არიან პარლამენტში, ანუ მათ მოაწერეს ხელი, რომ ისინი უარს აცხადებენ დეპუტატის მანდატზე, მეორე ეს გახლავთ, ასევე დე-ფაქტო პარლამენტში შესული პარტიების ხელმძღვანელი პირების ხელმოწერა სიების ჩახსნასთან დაკავშირებით, მესამე არის სრულიად ოპოზიციური სპექტრის, როგორც ფორმალურად ბარიერგადალახული, ასევე, ფორმალურად ბარიერგადაულახავი პარტიების ხელმოწერები იმასთან დაკავშირებით, რომ ერთმანეთს მხარს ვუჭერთ, სოლიდარობას ვუცხადებთ და ვითხოვთ ვადამდელ საპარლამენტო არჩევნებს".

რა წერია ოპოზიციის საერთო განცხადებაში

პოლიტიკური პარტიების განცხადება საპარლამენტო პროპორციული საარჩევნო სიების გაუქმებასთან დაკავშირებით

პოლიტიკური პარტიები, რომელთაც 2020 წლის 31 ოქტომბრის საპარლამენტო არჩევნების ცესკოს-ს შედეგების მიხედვით, გადავლახეთ დაწესებული ბარიერი და მოვხვდით უმაღლეს საკანონმდებლო ორგანოში. მივიჩნევთ, რომ არჩევნები გაყალბდა ქართული ოცნების მიერ და ის არ ასახავს ქართელის ხალხის ნებას. შესაბამისად მივმართავთ ცენტრალურ საარჩევნო კომისას მოთხოვნით, გააუქმოს ჩვენ მიერ წარდგენილი პროპორციული საარჩევნო სიები.

შეკრებილი ოპოზიცია სიტყვით გამოდის და საუბრობს, არჩევნების გაყალბებასა და დღეს პარლამენტში შეკრებილი ერთპარტიული სხდომის შესახებ. ერთიანი ნაციონალურ მოძრაობის ერთ-ერთმა ლიდერმა, ნიკა მელიამ განაცხადა, რომ ფასილიტატორების ჩართულობით მოლაპარაკებები გაგრძელდება.

ამ დროისთვის პარლამენტის პირველი სხდომა მიმდინარეობს. სხდომას მხოლოდ ქართული ოცნების დეპუტატები ესწრებიან.