პიანისტი და ახლა უკვე ქართული ოცნების საარჩევნო სიის 32-ე ნომერი ელისო ბოლქვაძე საკუთარ ფეისბუქგვერდზე პოსტს აქვეყნებს, სადაც ზვიად ძიძიგურს ივანიშვილის კრიტიკის გამო ახსნასა და პასუხებს სთხოვს.

"დღეს თქვენ ხელწერას უწუნებთ ბიძინა ივანიშვილს, მე კი, სწორედ, ამ ხელწერამ მომიყვანა ქართულ ოცნებაში და მაქვს პატივი, სწორედ, ამ გუნდიდან ვიყო წარმოდგენილი მეათე მოწვევის პარლამენტში. ეს ხელწერა იყო, რაც ათეული წლების განმავლობაში მხოლოდ ერთეულებმა ვიცოდით და რაც დღეს საყოველთაოდ ცნობილია — როდესაც ჩემს და თქვენს სამშობლოს ყველაზე მეტად გაუჭირდა, როდესაც ჩვენივე ხელით დავანგრიეთ სახელმწიფო და არ დავუტოვეთ რესურსი, ეზრუნა ქვეყანაზე და ხალხზე, სწორედ ბიძინა ივანიშვილი, როგორც ჭიგო ვაზს, ისე შეეხიდა სახელმწიფოს; ყველგან, სადაც უჭირდა სახელმწიფოს, სადაც აკლდებოდა რესურსი და ყურადღება, ეს ადამიანი უწვდიდა მას ხელს. ყველაფერს რომ თავი დავანებოთ, მარტო კულტურის სფეროში მის მიერ უჩუმრად, პრაქტიკულად, ანონიმურობის ზღვარზე დახარჯული დრო, ენერგია და რესურსია საკმარისი ჩემთვის, რათა მისი ხედვა და ხელწერა გამეგო და გამეთავისებინა", — წერს ელისო ბოლქვაძე საკუთარ პოსტში.

ელისო ბოლქვაძე კონკრეტულ, მკაფიო და წერილობით არგუმენტებს ითხოვს, თუ რამ არ დააკმაყოფილა ზვიად ძიძიგური, რა უნდა გაკეთებულიყო უკეთ და რა არ გაკეთდა.

გარდა ამისა, პიანისტი საკუთარ პოსტში აღნიშნავს იმასაც, რომ ძიძიგურის პარტიამ ხმების სულ რაღაც 0.16 პროცენტი აიღო.

"31 ოქტომბერს გარდა არჩევნებისა, თქვენი დაბადების დღეც იყო. 56 წლის ასაკში მიაღწიეთ ალბათ ისტორიულ მინიმუმს და ქვეყნის მასშტაბით ხმების 0,16% აიღეთ. ნუთუ, სწორედ ესაა მიზეზი, რომ ნაცვლად მიზეზებისა და შედეგების ადეკვატური გაანალიზებისა, სხვათა მსგავსად კვლავ ბიძინა ივანიშვილს მიადექით დანარჩენი ოპოზიციის მსგავსად და იგივე სახის კრიტიკა გაიზიარეთ, რასაც ამდენი წელი თავადვე პასუხობდით", — აღნიშნავს ბოლქვაძე.

ზვიად ძიძიგურმა ქართული ოცნება გასულ წელს დატოვა. ამის მიზეზად მან პროპორციული საარჩევნო სისტემის კანონპროექტის ჩაგდება დაასახელა.

"იმათ გასაგონად, ვინც შეიძლება თქვას, რომ ჩვენ გუნდი მივატოვეთ მაშინ, როდესაც გუნდს ძალიან ვჭირდებოდით. ბოდიში თქვენთან ყველასთან. ეს გადაწყვეტილება ჩვენით არ მიგვიღია. მიგვაღებინა იმ 40-მა დეპუტატმა, ვინც გუშინ უარი განაცხადა მხარი დაეჭირა საკონსტიტუციო ცვლილებებისთვის", — განაცხადა ძიძიგურმა.