ხანდახან სერიალებს რეალობისგან გასაქცევად ვუყურებთ: იქ, სადაც დრაკონები დაფრინავენ, ან / და გიკი ბავშვები ალტერნატიული განზომილების საიდუმლოებს იძიებენ, ჩვენი საყოფაცხოვრებო პრობლემები ნამდვილად ვერ მოგვაგნებენ. თუმცა ცხოვრებაში ისეთი მომენტებიც დგება, როცა რაღაც ხელშესახებისა და რეალურის ნახვა გვინდა და ასეთ დროს წარწერა "დაფუძნებულია რეალურ მოვლენებზე" გულს სულ სხვანაირად გვიჩქარებს.

დღეს იმ 5 საოცარ ისტორიაზე ვისაუბრებთ, რომელიც 5 საოცარ სერიალს დაედო საფუძვლად:

1. The Act (2019)

The Act დედაშვილის, დი დისა და ჯიპსი როუზ ბლანჩარდის ისტორიას გვიყვება. ერთი შეხედვით, დი დი ბლანჩარდი არაჩვეულებრივი მშობელი იყო: დაუღალავად ზრუნავდა სასიკვდილო დაავადებით შეპყრობილ შვილზე და ცდილობდა, მისთვის არაფერი მოეკლო, თუმცა მას შემდეგ, რაც ის საკუთარმა შვილმა მოკლა, აღმოჩნდა, რომ გოგონა არც არასდროს ყოფილა ავად.

სულ რაღაც 8 ეპიზოდში სერიალის შემქმნელებმა ამ შემზარავი საიდუმლოს ყველა ნიუანსი გვაჩვენეს.

2. When They See Us (2019)

When They See Us ხუთი შავკანიანი მოზარდის ისტორიაა, რომელთაც სასამართლო თეთრკანიანი ქალის გაუპატიურებას ედავება.

ნამდვილი ამბავი კი ასეთია: 1989 წელს, გვიან ღამით, ნიუ-იორკის ცენტრალურ პარკში 28 წლის ქალი უგონო მდგომარეობაში იპოვეს. მას სხეულზე გაუპატიურების კვალი ემჩნეოდა, ხოლო თავის ქალა ორ ადგილას ჰქონდა გატეხილი. ქალი რამდენიმე კვირის განმავლობაში ვერ ახერხებდა კომუნიკაციას და საშინელი ღამის შესახებ ვერაფერს იხსენებდა, თუმცა დეტექტივები ამ დროისთვის უკვე მუშაობდნენ საკუთარ ვერსიაზე. მათი აზრით, ეს დანაშაული ხუთმა შავკანიანმა მოზარდმა ჩაიდინა.

შეუნიღბავი რასიზმისა და გულგრილობის გამო პოლიციელებს ნამდვილი საშიში დამნაშავე უყურადღებოდ დარჩათ, ეს საქმე კი აშშ-ის ისტორიაში ერთ-ერთ ყველაზე გახმაურებულ სასამართლო პროცესად იქცა.

სერიალში ნაჩვენებია დონალდ ტრამპის კომენტარიც, სადაც ის სიტყვით გამოსვლის დროს ბიჭების სიკვდილით დასჯაზე საუბრობს.

3. American Crime Story (2016)

რაიან მერფის ეს პროექტი ორი დამოუკიდებელი სეზონისგან შედგება და ორი გახმაურებული მკვლელობის შესახებ გვიყვება. პირველი სეზონი ამერიკული ფეხბურთის ვარსკვლავის, ო.ჯეი სიმპსონის შესახებაა, რომელსაც სასამართლო ცოლისა და მისი საყვარლის მკვლელობაში სდებს ბრალს, მეორე სეზონი კი ჯანი ვერსაჩეს შესახებ გვიამბობს, რომელიც საკუთარი სახლის კიბეებზე მოკლა ენდრიუ ქიუნენენმა. ფიქრობთ, რომელი უკეთესია? მარტივად გეტყვით, რომ ო.ჯეის პროცესი უნდა ნახოთ. ეს იმდენად გახმაურებული საქმე იყო აშშ-ის ისტორიაში, რომ თავის დროზევე იქცა სატელევიზიო შოუდ, წლების შემდეგ კი კარდაშიანების იმპერიის შექმნა განაპირობა (ო.ჯეის ადვოკატი, რობერტ კარდაშიანი ცნობილი კარდაშიანების მამაა).

4. Feud: Bette and Joan (2017)

რაიან მერფის კიდევ ერთი მინი დრამა 60-იანების ჰოლივუდში გვამოგზაურებს და ამერიკული კინოს ორი ლეგენდარული ქალის – ბეტი დევისისა და ჯოან კროუფორდის მტრობაზე გვიყვება. დაპირისპირება ჰორორის – What happened to baby Jane გადასაღებ მოედანზე ვითარდებოდა.

რეალურ ცხოვრებაში ამბიციური ვარსკვლავები ყველაფრისთვის ებრძოდნენ ერთმანეთს: მამაკაცისთვის, როლებისთვის და ჯილდოებისთვის, მათი თითქმის კარიკატურული ზიზღი კი ჰოლივუდის მოარულ ლეგენდად იქცა.

5. Chernobyl (2019)

რა თქმა უნდა, ეს ჩამონათვალი არაფერი იქნებოდა, ჩერნობილის გარეშე. HBO-ს განუმეორებელი სერიალი გასული საუკუნის ყველაზე დიდი კატასტროფის, ჩერნობილის ყველა მხარეს გვაჩვენებს: აფეთქებიდან დაწყებული, მისი მიჩქმალვის მცდელობებით დასრულებული. მაყურებელი მოვლენებს სამი პერსპექტივით ეცნობა, პირველი - უშუალოდ სადგურზე მომუშავე ადამიანები, მეორე - სამთავრობო სხდომები და მესამე - მოქალაქის მიერ დანახული ამბავი, რომელსაც სადგურზე მისული მეხანძრის მეუღლის - ლუდმილა იგნატენკოს თვალით ვხედავთ.

არაჩვეულებრივი მსახიობები, საოცარი კადრები და მუსიკა, რომელიც ძვლებში აღწევს (Pun intended) – თუ ეს სერიალი ჯერ კიდევ არ გინახავთ, რას ელოდებით?