დაავადებათა კონტროლის ცენტრის ხელმძღვანელის, ამირან გამყრელიძის თქმით, რამდენიმე ქვეყანაში კორონავირუსის ვაქცინით არჩევითი ჯგუფების ვაქცინაცია დეკემბერში დაიწყება, ხოლო ფართომასშტაბიანი ხელმისაწვდომობა ვაქცინაზე მომავალი წლის გაზაფხულიდან იქნება. ამის შესახებ მან საკოორდინაციო საბჭოს სხდომის შემდეგ ისაუბრა.

გამყრელიძის თქმით, საქართველოში ხელმისაწვდომი იქნება ის ვაქცინა, რომელიც ჯანმრთელობის მსოფლიო ორგანიზაციის მიერ იქნება დამტკიცებული.

"ჩვენ გაერთიანებული ვართ კოვაქს პლატფორმაში, რომელიც მუშაობს გავიალიანსის ბაზაზე. გავიალიანსი გახლავთ ვაქცინების გლობალური ალიანსი და ჩვენ მასთან 2001 წლიდან ვთანამშრომლობთ. მასთან მჭიდრო თანამშრომლობა გვაქვს და ეს პლატფორმა შეისყიდის რამდენიმე ვაქცინას, რომელიც იქნება დამტკიცებული სამი ძლიერი მარეგულირებლის, ამერიკის წამლის სააგენტოს, ევროპის წამლის სააგენტოსა და ჯანმრთელობის მსოფლიო ორგანიზაციის მიერ", — აღნიშნა გამყრელიძემ.

როგორც იგი ამბობს, ვაქცინის მწარმოებელ ორ კომპანიას, Pfizer-ისა და Moderna-ს ლოჯისტიკის გართულებული მექანიზმები აქვთ, რის გამოც ახალი ტიპის სამაცივრე დანადგარების შეძენა დაიწყეს. მისი განმარტებით, სხვა რიგითი ვაქცინები 2-დან 8 გრადუს ტემპერატურაზე ინახება. თუმცა, Pfizer-ის ვაქცინა, შეიძლება შენახვა-გადატანას -70-80°C დაექვემდებაროს, ხოლო Moderna-ს — -20°C.

მისივე თქმით, საქართველოს ამ ეტაპისთვის დაახლოებით 700 ათასი ადამიანისთვის აქვს შეკვეთილი ვაქცინა.

"ყველა ეს ვაქცინა კეთდება ორჯერადად, სამი კვირის ან ოთხი კვირის გამოშვებით, ამიტომ საჭიროა 1 400 000 დოზა", — განმარტა გამყრელიძემ და დაამატა, რომ ეს, დაახლოებით, 17 მილიონი დოლარი ჯდება, საიდანაც 4 მილიონის წინასწარი შენატანი უკვე გაკეთებულია.

დაავადებათა კონტროლის ცენტრის ხელმძღვანელი ამბობს, რომ ვაქცინის მოსაპოვებლად ისინი ალტერნატიული გზებითაც მუშაობენ, ანუ სხვადასხვა კომპანიასთან პირდაპირ მოლაპარაკებებს აწარმოებენ.

რაც შეეხება ვაქცინაციას, გამყრელიძე ამბობს, რომ ეს პირველ რიგში მაღალი რისკის ჯგუფს, სამედიცინო პერსონალს შეეხება. შემდეგ უკვე იქნებიან ხანდაზმულები და თანხმლები დაავადებების მქონე პირები.

ამავე თემაზე: