ოცნების პარლამენტის თავმჯდომარის, შალვა პაპუაშვილის თქმით, აქციების დროს "აქციის მონაწილეების ძალადობრივი ქმედებების შედეგად, პარლამენტს დაახლოებით ნახევარი მილიონი ლარის ზიანი მიადგა". ამის შესახებ მან ჟურნალისტებთან განაცხადა.

"პარლამენტს ნახევარ მილიონ ლარამდე ზიანი აქვს მიყენებული. 130 ათასის ლარი უკვე არის გაწეული ამ ზიანის აღმოსაფხვრელად. ექსპერტიზაზე არის საკითხები და საბოლოო შეფასებებს ველით. ჩვენი ვარაუდია, რომ დაახლოებით 500 ათას ლარამდე არის ზიანი, რომელიც საქართველოს პარლამენტს მიადგა. გაკვირვებული კითხულობდა ჟურნალისტი, აქციის მონაწილეები პარლამენტის შიგნით არ იყვნენ და როგორ დააზიანესო, თქვენ სხვაგან იყურებოდით? ვერ ხედავდით, როგორ იწვოდა საქართველოს პარლამენტის ოთახები? ფასადიდან ჩანდა, ცეცხლი როგორ წაუკიდეს საქართველოს პარლამენტს და როგორ იწვოდა. ამის ფონზე, ზოგიერთი დიპლომატი და ელჩი გვეუბნებოდა, რომ ეს "მშვიდობიანი აქცია" იყო. ამ ყველაფერს რომ ხედავ ადამიანი, როგორ გინდა გჯეროდეს, რომ რაიმე ღირებულებებთან აქვს კავშირი სხვადასხვა ევროპელ ელჩს თუ დიპლომატს, რომელიც პარლამენტისთვის ცეცხლის წაკიდებას, "მშვიდობიან აქციას" ეძახის", — განაცხადა პაპუაშვილმა.

მან ევროპელ დიპლომატებს მიმართა, არასამთავრობო ორგანიზაციებისთვის მიმართული თანხა პარლამენტისთვის მიყენებული ზარალის ანაზღაურებას მოახმარონ.

"ამ დღეებში გვესმოდა, ფული უნდა გამოვყოთ იმ არასამთავრობო ორგანიზაციებისთვისო, რომლებიც რადიკალიზმის ორგანიზატორები იყვნენ. ხომ არ იფიქრებდნენ, რომ ამ თანხიდან ნაწილი მაინც აიღონ და დაფარონ ის ზიანი, რომელიც მათ მიერ დაფინანსებული არასამთავროების გამო, საქართველოს პარლამენტს მიადგა", — ამის შესახებ შალვა პაპუაშვილმა ჟურნალისტებთან განაცხადა.