საქართველოს მე-5 პრეზიდენტი, სალომე ზურაბიშვილი საქართველო-სომხეთის ეროვნული ნაკრებების შეხვედრის შემდეგ, დინამო არენაზე მომხდარ არეულობას გამოეხმაურა. მან ბოდიში მოუხადა "მეზობელ ხალხს ზოგ ჩვენ უჯიშო მოქალაქეების უმსგავსო საქციელისთვის".

ქალაქის მერი, კახა კალაძემ ზურაბიშვილის განცხადებაზე თქვა, რომ "ეს ქალბატონი მაკკეინის ფონდის კონსულტანტია და საერთოდ პორტსა და ფეხბურთში ვერ ერკვევა", რადგან "ფეხბურთში მსგავსი ფაქტები ხდება".

"თუ არ ვცდები, ეს ქალბატონი მაკკეინის ფონდის კონსულტანტია თუ რაღაც მსგავსი. ეს ადამიანი საერთოდ სპორტსა და ფეხბურთში რომ ვერ ერკვევა, გასაგებია. ისიც ნათლად ჩანს, თუ როგორი დამოკიდებულება აქვს ჩვენი ქვეყნის მოსახლეობის მიმართ. ცხადია, რაც მოხდა, არ იყო სასიამოვნო, მაგრამ ეს ფეხბურთია და ფეხბურთში მსგავსი ფაქტები ხდება — გულშემატკივრები ერთმანეთს უპირისპირდებიან. ეს არ ნიშნავს იმას, რომ ჩვენს მეგობარ სომხებთან რაიმე დაძაბულობა გვაქვს. ცუდი იყო ფაქტი, მაგრამ, ეს რა თქმა უნდა, არ და ვერ აისახება ჩვენს მეგობარ დებთან და ძმებთან ურთიერთობაზე.

არც ის ფაქტი იყო ლამაზი, გულშემატკივარი მოედანზე რომ შევიდა, თუმცა, ფეხბურთს ახასიათებს მსგავსი მომენტები", — განაცხადა კახა კალაძემ.

რაც შეეხება სალომე ზურაბიშვილის გამოხმაურებას, სრულად ასეთია:

"ბოდიშის მოხდა, ზოგს არა საჭირო ადგილას და არა სწორ მიმართულებით რომ უყვართ, იმათ გასაგონად.

როგორც ჯერაც ლეგიტიმური პრეზიდენტი, მინდა პრეზიდენტის როლში ბოდიში მოვუხადო ჩვენ მეზობელ ხალხს ზოგ ჩვენ უჯიშო მოქალაქეების უმსგავსო საქციელისთვის.

ჩვენ ვართ და ვიქნებით კეთილმეზობლურად განწყობილი სახელმწიფოები, უძველესი ქრისტიანული სარწმუნოების მატარებელი ერები, და ვიცხოვრებთ მშვიდობიან ევროპულ კავკასიაში!" — წერს სალომე ზურაბიშვილი სოციალურ ქსელში.