საზოგადოებრივი მაუწყებელი განცხადებას ავრცელებს სადაც ნათქვამია, რომ მეოთხე თვეა სხვადასხვა პოლიტიკური თუ სამოქალაქო ჯგუფის მიერ საზოგადოებრივი მაუწყებლის წინააღმდეგ აქტიურად ხორციელდება მიზანმიმართული დისკრედიტაციის კამპანია. მაუწყებლის თანამშრომლები თავიანთ პროფესიულ მოვალეობას სხვადასხვა ფორმით გამოხატული ზეწოლის, თავდასხმებისა და შეურაცხყოფის ფონზე ასრულებენ, რასაც მხოლოდ თმენით და მაღალი პროფესიონალიზმით პასუხობენ.

მათივე თქმით, საზოგადოებრივი მაუწყებლის მენეჯმენტი თავის საქმიანობაში არის დამოუკიდებელი და ხელმძღვანელობს საქართველოს კანონმდებლობით, სამეურვეო საბჭოს წევრთა მიერ გამოთქმულ შეფასებებს კი სარეკომენდაციო ხასიათი აქვს.

"მაუწყებლის მენეჯმენტი თავის საქმიანობაში არის დამოუკიდებელი და ხელმძღვანელობს საქართველოს კანონმდებლობით, ყველა გადაწყვეტილება მიიღება ორგანიზაციის არსის, მისი მისიის და მიზნების, მასში დასაქმებული ადამიანების უფლებების და ინტერესების, კეთილსინდისიერებისა და სამართლიანობის პრინციპების დაცვით.

კანონმდებლობის შესაბამისად, ორგანიზაციაში არსებობს ორი ხელმძღვანელი ორგანო – სამეურვეო საბჭო და გენერალური დირექტორი (მასთან არსებული დირექტორთა საბჭო). სამეურვეო საბჭო სამუშაო შეხვედრაზე გაეცნო იურიდიული სამსახურის მიერ წარმოებულ მოკვლევის შედეგებს, სადაც არ გამოიკვეთა საზოგადოებრივი მაუწყებლის მიმართ გაჟღერებული ბრალდებების ფაქტობრივი გარემოებები და საფუძვლები, ხოლო სამეურვეო საბჭოს წევრთა მიერ გამოთქმულ შეფასებებს აქვს სარეკომენდაციო ხასიათი.

რაც შეეხება მიმდინარე პროცესებთან დაკავშირებულ გადაწყვეტილებებს, ის იქნება მიღებული მხოლოდ საზოგადოებრივი მაუწყებლის მენეჯმენტის მიერ, გარედან ჩართული სხვა სტრუქტურების გარეშე, საქართველოს შრომის კანონმდებლობით და საზოგადოებრივი მაუწყებლის შიდა რეგულაციებით გათვალისწინებული დებულებების შესაბამისად, რაც სრულ თანხვედრაშია საერთაშორისო მედიასტანდარტებთან", — ნათქვამია განცხადებაში.

შეგახსენებთ, რომ საზოგადოებრივ მაუწყებელში დაწყებული მოკვლევის შედეგებთან დაკავშირებით, 21 მარტს ტელევიზიის სამეურვეო საბჭომ სამუშაო შეხვედრა გაიმართა.

სამეურვეო საბჭოს 8 წევრი მიიჩნევს, რომ პირველი არხის თანამშრომლების, ნინო ზაუტაშვილის, ვასილ ივანოვ-ჩიქოვანის, კახაბერ მელიქიძისა და გია იმნაიშვილის კრიტიკული განცხადებებით პროკურატურა უნდა დაინტერესდეს.

მაუწყებლის იურიდიული სამსახურის უფროსმა, ელენე მიხაილოვამ კი თქვა, რომ 3-4 თებერვლის სხდომების ჩანიშვნამდე, დისციპლინარული წარმოება დაწყებული იყო ნინო ზაუტაშვილის, ვასილ ივანოვ-ჩიქოვანისა და კახაბერ მელიქიძის წინააღმდეგ.