აზერბაიჯანისა და სომხეთის საზღვარზე რუსეთი დამატებით სასაზღვრო ძალებს განალაგებს. როგორც უსაფრთხოების ფედერეციული სამსახურის უფროსმა პრეზიდენტ ვლადიმერ პუტინს უთხრა, ეს გადაწყვეტილება ერევნის თხოვნით მიიღეს.

ალექსანდრ ბორტნიკოვის თქმით, დამატებით 188 სამხედრო და შესაბამისი რაოდენობის ტექნიკა გამოიყოფა.

9 ნოემბერს გვიან ღამით რუსეთის შუამავლობით სომხეთსა და აზერბაიჯანს სამშვიდობო შეთანხმება გაფორმდა. დოკუმენტი აზერბაიჯანისთვის გარკვეული ტერიტორიების — აღდამის, ქალბაჯარისა და ლაჩინის რეგიონების დაბრუნებას ითვალისწინებს.

ლაჩინის რეგიონში 5 კილომეტრი სიგანის დერეფანი შეიქმნა. დერეფანი მთიან ყარაბაღსა და სომხეთს აკავშირებს ერთმანეთთან, არ ეხება ქალაქ შუშას (შუშის) და რუსეთის სამშვიდობოების კონტროლის ქვეშ იქნება.

რუსეთის სამშვიდობო მისია ლაჩინის რეგიონში ხუთი წლით დარჩება და მათი იქ ყოფნის ვადა ავტომატურად გაგრძელდება, თუ ვადის ამოწურვამდე ექვსი თვით ადრე რომელიმე მხარე აღნიშნული რეჟიმის გაუქმებას არ მოინდომებს.

მთიან ყარაბაღში ომის დასრულების შესახებ შეთანხმება სომხეთში კაპიტულაციად აღიქვეს, რასაც მოსახლეობის პროტესტი მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. მას ოპერაცია ჩაუტარდა. ერევნისგან განსხვავებით, ბაქოში შეთანხმებას სიხარულით შეხვდნენ.

ილჰამ ალიევი ამბობს, რომ რუსი სამხედროების გარდა ზონაში თურქი მშვიდობისმყოფელებიც იქნებიან, თუმცა რუსეთი ამას უარყოფს. ალიევმა შეთანხმებას ისტორიული უწოდა და თქვა, რომ ეს სომხეთის კაპიტულაციას ნიშნავს.

ნიკოლ ფაშინიანი კი აღნიშნავს, რომ შეთანხმების ხელმოწერის გარდა, სხვა გზა არ ჰქონდა. როგორც ის განმარტავს, გადაწყვეტილება ანალიზის შედეგად მიიღეს. მთიან ყარაბაღში სამხედრო დაპირისპირება 27 სექტემბერს განახლდა.

ამავე თემაზე: