ყირგიზეთის რესპუბლიკაში ვიზიტის ფარგლებში, საგარეო უწყების ხელმძღვანელი მაკა ბოჭორიშვილი ყირგიზ კოლეგას, ჟეენბეკ კულუბაევს შეხვდა.

მინისტრებმა ორმხრივი და მრავალმხრივი თანამშრომლობის საკითხები განიხილეს.

"განსაკუთრებული ყურადღება გამახვილდა ეკონომიკური თანამშრომლობის განვითარების მნიშვნელობაზე. საუბარი ასევე შეეხო სატრანსპორტო და ლოგისტიკური მიმართულებებით თანამშრომლობას, "შუა დერეფნის" განვითარების მნიშვნელობას ორივე ქვეყნისთვის და რეგიონული თანამშრომლობის საკითხებს.

ასევე, განხილულ იქნა სექტორული თანამშრომლობის განვითარება. მინისტრმა ყირგიზ კოლეგას გაეროს უშიშროების საბჭოში 2027-2028 წლების არამუდმივ წევრად არჩევა მიულოცა. მაკა ბოჭორიშვილმა ყირგიზეთის საგარეო საქმეთა მინისტრი საქართველოში ვიზიტით მოიწვია.

ყირგიზეთის რესპუბლიკაში საქართველოს პრემიერ-მინისტრის ვიზიტის ფარგლებში ხელი მოეწერება ორ ქვეყანას შორის შეთანხმებებს სხვადასხვა სფეროში", — წერია საგარეო უწყების მიერ გავრცელებულ ინფორმაციაში.

ირაკლი კობახიძე 3 მინისტრთან ერთად ყირგიზეთში გუშინ, 11 ივნისს გაემგზავრა. დელეგაციის შემადგენლობაში არიან: საგარეო საქმეთა მინისტრი მაკა ბოჭორიშვილი, ეკონომიკისა და მდგრადი განვითარების მინისტრი მარიამ ქვრივიშვილი, გარემოს დაცვისა და სოფლის მეურნეობის მინისტრი დავით სონღულაშვილი და მთავრობის ადმინისტრაციის უფროსი ლევან ჟორჟოლიანი