შეგახსენებთ, რომ 11 ივნისს ბრიუსელში, ევროკომისიის წარმომადგენლებსა საქართველოს დელეგაციას შორის უვიზო მიმოსვლის საკითხზე შეხვედრა გაიმართა. ევროკომისიის პრესსპიკერ მარკუს ლამერტის თქმით, შეხვედრა ტექნიკური და პროცედურული ხასიათის იყო და აღნიშნული მოლაპარაკებები სავიზო რეგულაციით გაწერილ სტანდარტულ წესს წარმოადგენს, რომელიც ავტომატურად მაშინ იწყება, როდესაც სავიზო რეჟიმის შეჩერების მექანიზმი უკვე ამოქმედებულია.

"ევროსკოპის" ცნობით, შეხვედრა ორ საათს გაგრძელდა. ქართული მხარის წარმომადგენელი, გიორგი ტაბატაძე "ევროსკოპთან" ამბობს, რომ პოზიტიურადაა განწყობილი.

"დიალოგის ფარგლებში გვქონდა სამუშაო შეხვედრა, მოვისმინეთ მათი პოზიციები, მათ ჩვენი პოზიციები მოისმინეს და შემდგომ უკვე მომავალში გვიჩვენებს დრო", — ამბობს გიორგი ტაბატაძე.

11 ივნისის შეხვედრის შესახებ განცხადება გაავრცელა საქართველოს საგარეო საქმეთა სამინისტრომ. უწყების განმარტებით, "არასაკმარისი დასაბუთების საფუძველზე მიღებული გადაწყვეტილება საქართველოს დიპლომატიური და სამსახურებრივი პასპორტის მფლობელებისთვის უვიზო რეჟიმის დროებით შეჩერების შესახებ უსამართლოა". ამას გარდა საგარეო უწყება აღნიშნავს, რომ შეხვედრაზე "ხაზი გაესვა, რომ საქართველოს კონსტიტუცია და მოქმედი კანონმდებლობა უზრუნველყოფს მოქალაქეთა ძირითადი უფლებებისა და თავისუფლებების დაცვას".

ევროკავშირის საელჩო აცხადებს, რომ ეს შეხვედრა ევროკავშირის სავიზო რეგულაციით დადგენილ სტანდარტულ პროცესს წარმოადგენდა, რომელიც ვიზის შეჩერების მექანიზმის გააქტიურების შემთხვევაში იწყებს მოქმედებას.

ეს პროცესი მოჰყვა 2026 წლის მარტში მიღებულ გადაწყვეტილებას, რომლის მიხედვითაც, საქართველოს დიპლომატიური, სამსახურებრივი და ოფიციალური პასპორტების მფლობელებისთვის უვიზო მიმოსვლა საწყის ეტაპზე შეჩერებულ იქნა თორმეტი თვის განმავლობაში, წევრი სახელმწიფოების თანხმობის შემდეგ.

"შეხვედრის მიზანია იმ გარემოებების მოგვარება, რომლებმაც აღნიშნული შეჩერება გამოიწვია. შეგახსენებთ, რომ ვიზის შეჩერების მექანიზმის ამოქმედების საფუძველს საქართველოს მიერ უვიზო რეჟიმის ფარგლებში დემოკრატიისა და ფუნდამენტური უფლებების ძირითად სფეროებში აღებული ვალდებულებების დარღვევა წარმოადგენდა", — ნათქვამია საელჩოს მიერ გავრცელებულ ინფორმაციაში