სტივენ სპილბერგმა განაცხადა, რომ ჯეიმს ბონდის ფილმების პროდიუსერებმა მასთან მუშაობაზე ორჯერ თქვეს უარი — დღეს კი ის მათთვის ზედმეტად ძვირია.

კითხვაზე, ნანობს თუ არა, რომ ჯეიმს ბონდის არცერთი ფილმი არ გადაუღია, სპილბერგმა გაიხსენა, როგორ მიმართა ალბერტ ბროკოლის — ლეგენდარულ პროდიუსერს, რომელიც 1962 წლის Dr No-დან 1989 წლის Licence to Kill-მდე ბონდის ყველა ოფიციალურ ფილმზე მუშაობდა. სპილბერგმა აღნიშნა: "ჯეიმს ბონდის ფილმის გადაღება იმ დღიდანვე მინდოდა, რაც Dr No ვნახე. ამიტომ, Jaws-ის წარმატების შემდეგ ბროკოლის დავუკავშირდი და ჩემი კანდიდატურა შევთავაზე. ვუთხარი, რომ თუ რეჟისორი სჭირდებოდათ, სიამოვნებით გადავიღებდი ფილმს. მან უარით გამომისტუმრა".

სპილბერგის თქმით, ბროკოლი მას მეორედ 1977 წელს, Close Encounters of the Third Kind-ის გამოსვლის შემდეგ დაუკავშირდა: "ქაბიმ ისევ დამირეკა მას შემდეგ, რაც Close Encounters გამოვიდა და დიდი პოპულარობა მოიპოვა... მითხრა, რომ სურდათ ამ ხუთი ნოტის გამოყენება Moonraker-ში. მე კი ასეთი გარიგება შევთავაზე: ნოტების გამოყენების ნებართვას მოგცემთ, თუ ბონდის ფილმს გადამაღებინებთ. მან კვლავ უარით მიპასუხა. თუმცა, ხუთი ნოტის გამოყენების უფლება მაინც მივეცი".

ფოტო: MSN

რეჟისორი იხსენებს, რომ სწორედ ამ ისტორიამ მიიყვანა იგი ფილმამდე Raiders of the Lost Ark — სპილბერგმა ვარსკვლავური ომების პრემიერისას ჯორჯ ლუკასს ბროკოლის უარზე უამბო, ლუკასმა კი მას საკუთარი ახალი პროექტი შესთავაზა: "სწორედ მაშინ მითხრა ჯორჯმა: ბონდზე ბევრად უკეთესი რამ მაქვს, მას ინდიანა სმიტი ჰქვიაო — იმ პერიოდში პროექტს ასე ერქვა. ინდიანა ჯონსის სერიების იდეა გამაცნო და ეს სამსახურიც ასე მივიღე".

სპილბერგმა დაამატა, რომ ბროკოლის არასდროს აუხსნია მისთვის, რატომ ეუბნებოდა უარს ჯეიმს ბონდის ფილმის გადაღებაზე. თუმცა, მისი ამჟამინდელი პოზიცია ასეთია: "ახლა რომ მთხოვონ ბონდის ფილმის გადაღება, ჩემი პასუხი ასეთი იქნება: 'მე თქვენთვის ზედმეტად ძვირი ვარ'".