ილონ მასკის რაკეტების, თანამგზავრული ინტერნეტისა და ხელოვნური ინტელექტის კომპანიამ, SpaceX-მა, აქციების პირველადი საჯარო შეთავაზების (IPO) ფასი გამოაცხადა, რაც თითო აქციაზე $135-ს შეადგენს. ეს ნაბიჯი ისტორიაში უმსხვილეს, $75 მილიარდად შეფასებულ IPO-ს უხსნის გზას.

Bloomberg-ისა და Forbes-ის რეიტინგების მიხედვით, მასკი აქამდეც მსოფლიოს უმდიდრესი ადამიანი იყო. გარდა ამისა, თუ კომპანია Tesla-ში გარკვეულ მიზნებს მიაღწევს, მას ტრილიონდოლარიანი პაკეტის მიღებაც შეუძლია. თუმცა, მანამდე, ტრილიონერის სტატუსის მისაღწევად მასკს SpaceX-ის IPO დაეხმარება.

SpaceX-ის მიერ გასაჯაროებული მონაცემებით, მასკი კომპანიის აქციების დაახლოებით ნახევარს ფლობს. მათ შორისაა ის აქციებიც, რომლების ღირებულებაც შეიძლება შორეულ მომავალში სხვადასხვა მიღწევისთვის გამოიმუშაოს (როგორიცაა კოსმოსში მონაცემთა ცენტრების გაშვება და მარსზე ადამიანთა დასახლების შექმნა). ახალი IPO-ს ფასის მიხედვით, მასკის ეს აქციები SpaceX-ში დაახლოებით $867 მილიარდადაა შეფასებული.

ილონის კუთვნილ Tesla-ს წილთან ერთად, მასკის აქციების ღირებულება ამ ორ კომპანიაში ჯამურად $1.1 ტრილიონზე მეტს შეადგენს.

მასკის ქონება ამ ყველაფრის გათვალისწინებით მსოფლიოს მომდევნო 3 უმდიდრესი ადამიანის ერთად აღებულ ქონებას გაუტოლდება:

ფოტო: Reuters

თუმცა, მისი ტრილიონერობის სტატუსს განმარტება სჭირდება: SpaceX-მა მასკს კომპანიის აქციების მსხვილი პაკეტები გადასცა, რომლებიდანაც ბიზნესმენი მხოლოდ იმ შემთხვევაში მიიღებს თანხას, თუ ის კომპანიის ღირებულებას გრანდიოზულად გაზრდის და თუ SpaceX მიაღწევს მასკის მიზანს — მარსზე დასახლებულ ადამიანთა კოლონიის შექმნას. ამ აქციების გარეშე, მასკს ჯერჯერობით ცოტა აკლია ტრილიონერის სტატუსამდე.

ამის მიუხედავად, Bloomberg-ის მილიარდერთა ინდექსის მიხედვით, Tesla-სა და SpaceX-ში მასკის აქციების ღირებულება 10-ჯერ აღემატება Microsoft-ის თანადამფუძნებლის, ბილ გეითსის ქონებას.

$1 ტრილიონად შეფასებული ქონებით, ილონ მასკის სიმდიდრე ათობით ქვეყნის წლიურ მთლიან შიდა პროდუქტს გადააჭარბებს. ეს ქვეყნებია: საბერძნეთი, შვედეთი, არგენტინა, ნორვეგია, ირანი, საქართველო, პორტუგალია და ა. შ. (იხილეთ რუკაზე).

ფოტო: Reuters

SpaceX-ის აქციების ყიდვა-გაყიდვა პარასკევს დაიწყება. თუ SpaceX-ის აქციის ფასი პარასკევს $140-მდე გაიზრდება, მასკი მხოლოდ ამ აქციების ღირებულებითაც ტრილიონერი გახდება, იმ აქციების გამოკლებითაც კი, რომლებიც მარსისა და კოსმოსურ მონაცემთა ცენტრების პროექტებზეა დამოკიდებული.