სომხეთის თავდაცვის მინისტი, დავიდ ტონოიანი თანამდებობიდან გადადგა. ამის შესახებ ინფორმაცია სომხურ მედია არმენპრესს დაუდასტურეს. ოფიციალური განცხადება, ჯერჯერობით, არ კეთდება. მედია, ასევე, წერს, რომ ტონოიანს თავდაცვის მინისტრის პოსტზე პრემიერ მინისტრ ნიკოლ ფაშინიანის მთავარი მრჩეველი, ვაგარშაკ არუთუნიანი შეცვლის.

ტონოიანი მინისტრის თანამდებობაზე 2018 წლის 11 მაისს დაინიშნა. მანამდე ის საგანგებო სიტუაციების მართვის სამსახურის ხელმძღვანელის პოსტს იკავებდა. ვაგარშაკ არუთუნიანი თავდაცვის მინისტრის პოსტს 1999-2000 წლებში იკავებდა.

რაც შეეხება სომხეთის საგარეო საქმეთა მინისტრს, ზოჰრაბ მნაცაკანიანმა თანამდებობა 16 ნოემბერს დატოვა.

9 ნოემბერს გვიან ღამით რუსეთის შუამავლობით სომხეთსა და აზერბაიჯანს სამშვიდობო შეთანხმება გაფორმდა. სამმხრივი შეთანხმების მიხედვით, აღდამის რეგიონი აზერბაიჯანს 20 ნოემბრამდე უნდა დაუბრუნდეს. 15 ნოემბრამდე აზერბაიჯანს გადაეცემა ლაჩინის რეგიონი. გარდა ამისა, მთიან ყარაბაღში ბრუნდებიან დევნილები.

ლაჩინის რეგიონში 5 კილომეტრი სიგანის დერეფანი შეიქმნება. დერეფანი მთიან ყარაბაღსა და სომხეთს დააკავშირებს ერთმანეთთან, არ შეეხება ქალაქ შუშას (შუშის) და რუსეთის სამშვიდობოების კონტროლის ქვეშ იქნება. ლაჩინის დერეფანში 1 960 რუსი სამხედრო, 90 ჯავშანტრანსპორტიორი და 380 ერთეული საავტომობილო და სპეციალური ტექნიკა განლაგდება.

რუსეთის სამშვიდობო მისია ლაჩინის რეგიონში ხუთი წლით დარჩება და მათი იქ ყოფნის ვადა ავტომატურად გაგრძელდება, თუ ვადის ამოწურვამდე ექვსი თვით ადრე რომელიმე მხარე აღნიშნული რეჟიმის გაუქმებას არ მოინდომებს.

მთიან ყარაბაღში ომის დასრულების შესახებ შეთანხმება სომხეთში კაპიტულაციად აღიქვეს, რასაც მოსახლეობის პროტესტი მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. მას ოპერაცია ჩაუტარდა. ერევნისგან განსხვავებით, ბაქოში შეთანხმებას სიხარულით შეხვდნენ.

ილჰამ ალიევი ამბობს, რომ რუსი სამხედროების გარდა ზონაში თურქი მშვიდობისმყოფელებიც იქნებიან, თუმცა რუსეთი ამას უარყოფს. ალიევმა შეთანხმებას ისტორიული უწოდა და თქვა, რომ ეს სომხეთის კაპიტულაციას ნიშნავს.

ფაშინიანი კი აღნიშნავს, რომ შეთანხმების ხელმოწერის გარდა, სხვა გზა არ ჰქონდა. როგორც ის განმარტავს, გადაწყვეტილება ანალიზის შედეგად მიიღეს. მთიან ყარაბაღში სამხედრო დაპირისპირება 27 სექტემბერს განახლდა.

ამავე თემაზე: