ბრიტანეთის დედოფალ ელიზაბეტ II-სა და მის ქმარს, ედინბურგის ჰერცოგ პრინც ფილიპს, დღეს, 20 ნოემბერს, ქორწინების 73-ე იუბილე აქვთ, რის აღსანიშნავადაც ბუკინგემის სასახლემ გამოაქვეყნა ფოტო, რომელშიც სამეფო წყვილი მათი შვილთაშვილების — პრინცი ჯორჯის, პრინცესა შარლოტასა და პრინცი ლუისის — გაკეთებულ ბარათს უყურებს.

ფოტოზე წყვილი დივანზე ზის უინძორების ციხე-სიმაგრეში, სადაც ისინი ამჟამად ინგლისში მიმდინარე ე.წ. "ლოქდაუნს" ატარებენ.

დედოფალს ქრიზანთემის გულსაბნევი უკეთია, რომელიც პლატინაში ჩასმული საფირებითა და ბრილიანტებითაა გაკეთებული, რაც, შესაძლოა, სიმბოლურად წყვილის ხანგრძლივ ცოლ-ქმრულ ურთიერთობას აღნიშნავდეს. მას იგივე გულსაბნევი ეკეთა ჰემფშირში თაფლობის თვის დროს, ასევე 2007 წელს მე-60 იუბილეს — ბრილიანტის ქორწინების — აღსანიშნავად.

წყვილის ოქროს იუბილეზე, 23 წლის წინ, დედოფალმა ლონდონში სიტყვით გამოსვლის დროს პრინც ფილიპზე თქვა: "ის იმ ადამიანებს შორისაა, რომლებსაც კომპლიმენტები არ უყვართ, თუმცა, მარტივად რომ ვთქვა, ის იყო და არის ჩემი ძალა მთელი ამ წლების განმავლობაში".

სამეფო წყვილმა ბევრი დრო გაატარა ერთმანეთისგან განცალკევებით მას შემდეგ, რაც 2017 წელს ფილიპმა, რომელიც ახლა 99 წლისაა, საჯარო საქმიანობაზე უარი თქვა და ნორფოლკში გადასახლდა, დედოფალი კი უინძორების ციხე-სიმაგრესა და ბუკინგემის სასახლეში დარჩა.

ფერადი ბარათი, რომელზეც 73-ია გამოსახული, წყვილის იუბილეს მისალოცი რამდენიმე ბარათიდან და წერილიდან ერთ-ერთია. ფოტოზე მათი პატარა წყება ჩანს მაგიდაზე.