ევროპული საქართველოს ერთ-ერთი ლიდერის, გიგი უგულავას განცხადებით, გრიგოლ ვაშაძე, შესაძლოა, საერთაშორისო პარტნიორებთან პრივატულ მოლაპარაკებებს აწარმოებდა, მაგრამ არა ერთიანი ოპოზიციის სახელით.

"არანაირ მოლაპარაკებას გრიგოლ ვაშაძე არ აწარმოებდა, ეს არის ტყუილია. მას, შესაძლოა, პრივატული შეხვედრები სხვადასხვა საელჩოს წარმომადგენლებთან, ამას არ გამოვრიცხავ, მას ეს ხშირად აქვს. არანაირი ოპოზიციის სახელით მოლაპარაკებას ჩვენს საერთაშორიოს პარტნიორებთან გრიგოლ ვაშაძე არ აწარმოებდა. საუბრობდა თუ არა ნაციონალური მოძრაობის სახელით, ეს მათ უნდა ჰკითხოთ, მე ვსაუბრობ ოპოზიციის საერთო სახელით. ვერ ისაუბრებდა იმიტომ, რომ მას ეს მანდატი აქამდე არ ჰქონია და ამ ინტერვიუს მერე, ვეჭვობ, რომ საერთოდ ჰქონდეს", — განაცხადა გიგი უგულავამ.

რუსთავი 2-ის ეთერში გრიგოლ ვაშაძემ ისაუბრა, რომ დიპლომატიური მეთაურების დახმარებით, მმართველ გუნდთან ოპოზიციის "თითქმის მომზადებული" მოლაპარაკებები ჩაიშალა

ვაშაძის ამ განცხადებამ ოპოზიციაში უკმაყოფილება გამოიწვია. გირჩის ერთ-ერთმა ლიდერმა, ზურაბ ჯაფარიძემ განაცხადა, რომ არანაირი მოლაპარაკებისთვის მზადება არ ყოფილა და კითხვა დასვა, იტყუებოდა, თუ რა მოლაპარაკებებზე საუბრობდა ენმ-ის ერთ-ერთი ლიდერი.

10 ნოემბერს გავრცელდა ენმ-ის თავმჯდომარის, გრიგოლ ვაშაძის განცხადება, სადაც ის პოლიტიკურ პარტიებს მოუწოდებდა, პროცესი მშვიდობიან მაგიდასთან გადაიტანონ და ჩაანაცვლონ ქუჩა ყველა დონის საკანონმდებლო ორგანოების ტრიბუნით. განცხადებას კრიტიკა მოყვა ოპოზიციაში, მათ შორის, ენმ-შიც.

ვაშაძემ თავის განცხადებაზე დამატებითი განმარტებები გაავრცელა. მან Facebook-ზე დაწერა, რომ პროტესტი უნდა გაგრძელდეს, მაგრამ დაემატოს პოლიტიკური კომპონენტი.

"დამატებით განვმარტავ:

  1. მოქალაქეთა პროტესტი უნდა გაგრძელდეს;
  2. ამ პროტესტს სასწრაფოდ უნდა დაემატოს პოლიტიკური კომპონენტი - სამართლიანი არჩევნების პრინციპების განხორციელების თაობაზე მოლაპარაკებების სახით სტრატეგიული მოკავშირეების მედიაციით;
  3. სანამ/თუ მოლაპარაკებები წარმატებით არ დასრულდება არც მეორე ტურში მონაწილეობას არ ვღებულობთ და არც პარლამენტში არ შევდივართ;
  4. ერთხელ და სამუდამოდ ყველა უნდა დავიძაბოთ, რომ მომავალში ქუჩის პროტესტმა ნორმალური პროცესი არ ჩაანაცვლოს არჩევნების გაყალბების გამო", — წერს ვაშაძე.

ოპოზიციის წარმომადგენლები 31 ოქტომბერს ჩატარებული არჩევნების ლეგიტიმაციას არ ცნობენ და საპარლამენტო მანდატებზე უარს ამბობენ. არც ერთი პარტია, რომელმაც 1%-იანი ბარიერი გადალახა, პარლამენტში არ შედის. ისინი პერმანენტულ აქციებს აანონსებენ და ცენტრალური საარჩევნო კომისიის თავმჯდომარის, თამარ ჟვანიას გადაყენებასა და რიგგარეშე არჩევნების დანიშვნას მოითხოვენ. პარლამენტთან გაიმართა რამდენიმე აქცია, ასევე, გაიმართა მსვლელობა ცესკოსკენ, სადაც სპეცრაზმმა წყლის ჭავლის გამოყენებით მომიტინგეები დაშალა.