ერევანში პრემიერმინისტრის, ნიკოლ ფაშინიანის გადადგომის მოთხოვნით, საპროტესტო აქცია მიმდინარეობს. დემონსტრანტებმა გადადგომისთვის პრემიერს ვადა შუაღამემდე მისცეს. მოქალაქეების პროტესტი ყარაბაღზე ფაშინიანის მიერ გაფორმებულმა ხელშეკრულებ0ა გამოიწვია. მიტინგის ორგანიზატორები პრემიერს "მიწების ჩაბარებაში" ადანაშაულებენ.

როგორც RIA წერს, თუ ფაშინიანი არ გადადგება, დემონსტრანტები ამბობენ, რომ "მისი წასვლის საკითხს" თვითონ გადაწყვეტენ. ამის პარალელურად ერთ-ერთი ოპოზიციური პარტია პარლამენტის რიგგარეშე სხდომის მოწვევას ცდილობს, რათა პრემიერის გადაყენების საკითხი დააყენოს.

ერევნის ცენტრში მოქალაქეებმა შეკრება დილიდან დაიწყეს. 17 პარტიის მიერ ორგანიზებულ პროტესტზე დემონსტრანტები თავისუფლების მოედანზე შეიკრიბნენ და მთავრობის სახლისკენ დაიძრნენ, იქიდან კი პარლამენტისკენ გადაინაცვლეს.

პარტია დაშნაკცუთიუნის ლიდერმა, იშხან საგატელიანმა პრემიერმინისტრის მიერ თანამდებობის დატოვების ოთხპუნქტიანი გეგმა წარადგინა: პირველი, ფაშინიანი ნებაყოფლობით წავა; მეორე, სამშობლოს გადარჩენისთვის იქმნება კომიტეტი; მესამე, მოლაპარაკებების მაგიდასთან სომხეთი ახალი ლიდერით წარდგენა; მეოთხე, "ნაბიჯ-ნაბიჯ ვაშენებთ ძლიერ ქვეყანას".

9 ნოემბერს გვიან ღამით სომხეთმა და აზერბაიჯანმა მთიან ყარაბაღში ომის დასრულების შესახებ შეთანხმებას ხელი მოაწერეს. სომხეთში შეთანხმება კაპიტულაციად აღიქვეს, რასაც მოსახლეობის პროტესტი მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. მას ოპერაცია ჩაუტარდა. ერევნისგან განსხვავებით, ბაქოში შეთანხმებას სიხარულით შეხვდნენ.

სამმხრივ დოკუმენტს ხელი სომხეთის პრემიერმინისტრმა, ნიკოლ ფაშინიანმა, აზერბაიჯანის პრეზიდენტმა, ილჰამ ალიავმა და რუსეთის პრეზიდენტმა ვლადიმერ პუტინმა მოაწერეს ხელი. შეთანხმების თანახმად, სომხური მხარე აზერბაიჯანს კონფლიქტის ზონაში რამდენიმე ტერიტორიას გადასცემს, მთიან ყარაბაღში ბრუნდებიან დევნილები, კონფლიქტის ხაზის გასწვრივ კი რუსი სამშვიდობოები განლაგდებიან. რა სტატუსი ექნება მთიანი ყარაბაღის რეგიონს, შეთანხმებაში არ წერია.

ილჰამ ალიევი ამბობს, რომ რუსი სამხედროების გარდა ზონაში თურქი მშვიდობისმყოფელებიც იქნებიან. მან შეთანხმებას ისტორიული უწოდა და აღნიშნა, რომ ეს სომხეთის კაპიტულაციას ნიშნავს.

ფაშინიანი კი აღნიშნავს, რომ შეთანხმების ხელმოწერის გარდა, სხვა გზა არ ჰქონდა. როგორც ის განმარტავს, გადაწყვეტილება ანალიზის შედეგად მიიღეს.

ამავე თემაზე: