საგარეო საქმეთა მინისტრის, დავით ზალკალიანის განცხადებით, ოპოზიციის განცხადებები იმის შესახებ, თითქოს, აშშ-ს სახელმწიფო მდივანი, მაიკ პომპეო საქართველოში ქართული ოცნების გასაკრიტიკებლად ჩამოდის, ღიმილისმომგვრელი და არასერიოზულია. ზალკანიანის თქმით, ბოლო პერიოდში ოპოზიცია თარგმანსა და ლოგიკაში დაკარგულია. მან, ასევე, ოპონენტებს მოუწოდა, აშშ-ს ელჩის განცხადებები კარგად წაიკითხონ და პოლიტიკურ პროცესებს დროულად დაუბრუნდნენ.

"ღიმილისმომგვრელი და არასერიოზულია, არც კი ვაპირებ ამაზე ოპონენტებს სერიოზული პასუხი გავცე, რადგან ეს არის გაუთვითცნობიერება და არცოდნა საერთაშორისო ურთიერთობების. მათ შორის არიან ადამიანები, ვისაც აქვს საერთაშორისო ურთიერთობების გამოცდილება , თუმცა ამას საკუთარი პოლიტიკური ინტერესებისთვის და მანიპულაციებისთვის კვლავ იყენებენ. ვფიქრობ, ისინი [ოპოზიცია] ბოლო პერიოდში საერთოდ დაკარგული არიან თარგმანში, თანმიმდევრულობაში, განცხადებებში, ლოგიკაში. არანაირ ლოგიკაში არ ჯდება ამერიკის შეერთებული შტატების სახელმწიფო მდივნის ვიზიტი გამოიყენო შიდა პოლიტიკური ინტერესებისთვის", — განაცხადა ზალკალიანმა.

მისივე თქმით, აქ უმთავრესი გზავნილი არის ამერიკის შეერთებული შტატების მხრიდან საქართველოს მხარდაჭერა, საქართველოს სტაბილურობის, ქვეყნის პოლიტიკური, ეკონომიკური განვითარების მხარდაჭერა, საქართველოს როლის რეგიონში, როგორც ერთ-ერთი ლიდერის წარმოჩენა. ზალკალიანის თქმით, ოპონენტებმა ვერ გაიგეს, ან არ უნდათ გაგება იმ განცხადებების, რომელიც უკვე გაჟღერდა.

გუშინ, 10 ნოემბერს ცნობილი გახდა, რომ 17-18 ნოემბერს აშშ-ის სახელმწიფო მდივანი, მაიკ პომპეო საქართველოში ჩამოვა. ზალკალიანის განცხადებით, პომპეოს საქართველოში ვიზიტი აშშ-ის ადმინისტრაციის მხრიდან პოლიტიკური მხარდაჭერის მკაფიო ნიშანს წარმოადგენს.

ვიზიტის ფარგლებში სახელმწიფო მდივანი შეხვედრებს გამართავს პრემიერმინისტრგიორგი გახარიასთან საქართველოს პრეზიდენტთან სალომე ზურაბიშვილთან და საგარეო საქმეთა მინისტრ დავით ზალკალიანთან. მაიკ პომპეო თბილისში, ასევე, შეხვდება სრულიად საქართველოს კათოლიკოს-პატრიარქ ილია II-ეს.

ვიზიტის ფარგლებში გამართული შეხვედრებისას მხარეები განიხილავენ საქართველოსა და რეგიონში არსებული უსაფრთხოების გარემოს და ქვეყნებს შორის თანამშრომლობას რეგიონული და საერთაშორისო უსაფრთხოების განმტკიცების მიზნით. მხარეები, ასევე, განიხილავენ საქართველოში მიმდინარე დემოკრატიულ და ეკონომიკურ რეფორმებს.