საქართველოს საგარეო საქმეთა მინისტრ დავით ზალკალიანის განცხადებით, 17-18 ნოემბერს აშშ-ის სახელმწიფო მდივნის, მაიკ პომპეო საქართველოში ვიზიტი აშშ-ის ადმინისტრაციის მხრიდან პოლიტიკური მხარდაჭერის მკაფიო ნიშანს წარმოადგენს. ზალკალიანის თქმით, აღნიშნული ვიზიტი კიდევ ერთხელ ადასტურებს მთავარი სტრატეგიული პარტნიორის ურყევ მხარდაჭერას და ჩართულობას საქართველოს უსაფრთხოების, ქვეყნის განვითარებისა და ქვეყანაში მიმდინარე დემოკრატიული პროცესების მიმართ.

"ეს ვიზიტი გამორჩეულია იმ თვალსაზრისით, რომ წარმოადგენს ამერიკის შეერთებული შტატების ადმინისტრაციის მხრიდან პოლიტიკური მხარდაჭერის მკაფიო ნიშანს და სრულიად ეხმიანება 2 ქვეყანას შორის არსებულ მტკიცე პარტნიორობას და უაღრესად ნაყოფიერ თანამშრომლობას. ბოლო 4 წლის განმავლობაში აშშ-ის ამჟამინდელ ადმინისტრაცისთან ჩვენ გვქონდა უაღრესად ეფექტიანი თანამშრომლობა სტრატეგიული თანამშრომლობის ქარტიის ყველა ძირითადი მიამრთულებით: თავდაცვა და უსაფრთხოება, ეკონომიკა, დემოკრატიული ინსტიტუტების გაძლიერება, ხალხთა შორის ურთიერთობების გაღრმავება. ეს არის ყველა ის ძირითადი საკითხი, რომლის მიმართულებით ჩვენ გვაქვს უმნიშვნელოვანესი ხელშესახები შედეგები", — განაცხადა ზალკალიანმა.

ვიზიტის ფარგლებში სახელმწიფო მდივანი შეხვედრებს გამართავს პრემიერმინისტრ გიორგი გახარიასთან, საქართველოს პრეზიდენტთან სალომე ზურაბიშვილთან და საგარეო საქმეთა მინისტრ დავით ზალკალიანთან. მაიკ პომპეო თბილისში, ასევე, შეხვდება სრულიად საქართველოს კათოლიკოს-პატრიარქ ილია II-ეს.

ვიზიტის ფარგლებში გამართული შეხვედრებისას მხარეები განიხილავენ საქართველოსა და რეგიონში არსებული უსაფრთხოების გარემოს და ქვეყნებს შორის თანამშრომლობას რეგიონული და საერთაშორისო უსაფრთხოების განმტკიცების მიზნით. მხარეები, ასევე, განიხილავენ საქართველოში მიმდინარე დემოკრატიულ და ეკონომიკურ რეფორმებს.

საგარეო საქმეთა სამინისტროში აცხადებენ, რომ აშშ სახელმწიფო მდივნის ვიზიტი კიდევ ერთხელ უსვამს ხაზს აშშ-სა და საქართველოს შორის არსებული სტრატეგიული პარტნიორობის სიმტკიცეს.