აზერბაიჯანის პრეზიდენტის, ილჰამ ალიევის განცხადებით, ყარაბაღში რუს სამხედროებთან ერთად თურქული სამშვიდობო მისიაც იქნება. მან ამის შესახებ პუტინთან ვიდეოკონფერენციის დროს, დეკლარაციაზე ხელის მოწერამდე განაცხადა. დოკუმენტი აზერბაიჯანსა და სომხეთს შორის საომარი მოქმედებების შეწყვეტას, ასევე, ყარაბაღში რუსი სამხედროების განლაგებას ითვალისწინებს. გავრცელებულ დეკლარაციაში თურქეთის მშვიდობისმყოფელებზე საუბარი არ არის.

ალიევმა მადლობა გადაუხადა ვლადიმერ პუტინსა და რეჯებ ტაიპ ერდოღანს.

"მადლობა მისი [ერდოღანის] აქტიური მონაწილეობისთვის კონფლიქტის პოლიტიკური რეგულირების საქმეში. ერთ-ერთი პუნქტი ერთობლივი სამშვიდობო მისიაა რუსეთისა და თურქეთის, რითიც ჩვენ ვქმნით სრულიად ახალ ფორმატს რეგიონში ურთიერთობების არამხოლოდ კონფლიქტის დარეგულირების ჩარჩოების მოქცევის, არამედ სამომავლო განვითარების სახით", — თქვა ალიევმა.

აზერბაიჯანის პრეზიდენტმა ასევე აღნიშნა, რომ ეს დოკუმენტი გრძელვადიან მშვიდობას მოიტანს და სისხლისღვრას დაასრულებს.

"ძალიან მოხარული ვარ, რომ დღეს წერტილს დავსვამთ სომხეთისა და აზერბაიჯანის მრავალწლიანი კონფლიქტის დარეგულირების საქმეში, მთავრდება ოკუპაცია აზერბაიჯანული მიწების. ეს ერთ-ერთი ყველაზე ხანგრძლივი კონფლიქტია ჩვენს რეგიონში და ისტორიული მოვლენაა მისი დასრულება. ისტორიულია პირველ რიგში აზერბაიჯანელი ხალხისთვის, რომელიც გათავისუფლდა მრავალწლიანი ოკუპაციიდან", — თქვა ალიევმა.

სომხეთმა და აზერაიჯანმა, რუსეთთან ერთად, ყარაბაღში ომის შეწყვეტის შესახებ დეკლარაციას მოაწერეს ხელი. ინფორმაცია ამის შესახებ, თავდაპირველად, სომხეთის პრემიერმინისტრმა, ნიკოლ ფაშინიანმა გაავრცელა. მალევე, Twitter-ზე გამოქვეყნდა სრული დოკუმენტი, რაზე შეთანხმდნენ მხარეები. აქ არ ჩანს ხელმოწერები, თუმცა მითითებულია სამივე ქვეყნის წარმომადგენელი. მოგვიანებით, იგივე შინაარსი გაიმეორა რუსეთის პრეზიდენტმა, ვლადიმერ პუტინმა.

ცეცხლის შეწყვეტასთან დაკავშირებით სომხეთის პრემიერმინისტრის, ნიკოლ ფაშინიანის განცხადების შემდეგ, მოქალაქეები მთავრობის სახლში შეიჭრნენ. ამის შესახებ ინფორმაციას Liveuamap ავრცელებს. გამოცემის ცნობით, მომიტინგეები ფაშინიანის გადადგომას მოითხოვენ.

აქციის დროს, სომხეთის პარლამენტის სპიკერი, არარატ მირზოიანი დემონსტრანტებმა მანქანიდან გადმოათრიეს და სცემეს. ვრცელდება ინფორმაცია მისი გარდაცვალების შესახებ, თუმცა, ჯერჯერობით, დადასტურებული არ არის.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ერთმანეთს ადანაშაულებედნენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებდა.

რუსეთის შუამავლობით, სომხეთი და აზერბაიჯანი ჰუმანიტარული მიზნით ცეცხლის შეწყვეტაზე ორჯერ შეთანხმდნენ, თუმცა ზავი ორივეჯერ მალევე დაირღვა.