ლელოს გურიის მაჟორიტარობის ყოფილმა კანდიდატმა, ოზურგეთის სასამართლოს წინ ბრიფინგი გამართა და საოლქო კომისიაში შეტანილ საჩივრებზე ისაუბრა. მისი თქმით, გრძელდება საარჩევნო სპეცოპერაცია ლელოს მისამართით.

"საქმე ის არის, რომ საარჩევნო დავებთან მიმართებით კანონი ისედაც შემჭიდროვებულ ვადას, მხოლოდ ორ დღეს ითვალისწინებს. მოხდა ისე, რომ საჩივართან დაკავშირებული განკარგულებები, რომელიც ხუთ ნოემბერს უნდა ყოფილიყო გამოცემული, გუშინ, ექვს ნოემბრის ღამის 12 საათამდეც კი არ იყო ატვირთული. ჩვენს ხელთაა საოლქო კომისიაში ჩვენი წარმომადგენელის, ინგა ფრანგულაშვილსა და საოლქო კომისიის თანამშრომელს, თამთა გიორგაძეს შორის გამართული საუბრის აუდიოჩანაწერი, რომელიც გუშინ, ექვს ნოემბერს გაიმართა. ჩანაწერში გიორგაძე უდასტურებს ფრანგულაშვილს, რომ, თურმე, განკარგულება ხუთი ნოემბრის თარიღით არის მიღებული. საოლქო კომისიამ ამ ქმედებით, როცა განკარგულება დამალა და წინა რიცხვით მოგვიანებით ატვირთა, საარჩევნო სუბიექტს ის ორ დღიანი ვადაც კი მოგვპარა, რათა ხელი შეგვშლოდა სასამართლო გზით ჩვენი სიმართლისდამტკიცებაში", — განაცხადა გიორგი სიორიძემ.

გიორგი სიორიძემ აღნიშნა, რომ არ აქვს იმედი, რომ სასამართლოსთვის მიმართვის შემთხვევაში იგი გადაწყვეტილებას მიიღებს. მისი თქმით, ამის ამის მოლოდინი ილუზიაა.

"ოზურგეთის რაიონული სასამართლო არის კლანის ნაწილი და ბუნებრივია, არ მაქვს იმის მოლოდინი და ილუზია, რომ ის ობიექტურად განიხილავს ჩვენს დასაბუთებულ სარჩელს და მოსარჩელის სასარგებლო გადაწყვეტილებას მიიღებს. ბუნებრივია, ჩვენ ვერ ავყვებით უკანონობის გაუგონარ კასკადში, ვერც საარჩევნო ადმინისტრაციას, რომელიც ხმებთან ერთად უკვე დროსაც იპარავს და ვერც სასამართლო კლანს. ჩვენ, ცენტრალური საარჩევნო ადმინისტრაციისგან განსხვავებით, რომელიც საეროდ კანონგარეშე დგას ამ მომენტისთვის.

არ ვაყენებთ თავს სამართლებრივი სივრცის მიღმა და ვცდილობთ ყველა იმ ბერკეტის გამოყენებას, რაც გაგავაჩნია. მიუხედავად ოზურგეთის საოლქო საარჩევნო კომისიის მიერ ხელის გადაგრეხვისა, ჩვენ მაინც მოვასწარით სარჩელის მომზადება, ფაქტობრივად, რამდენიმე საათში და კანონით დადგენილ დროში შეგვაქს ის ოზურგეთის რაიონულ სასამართლოში", — აღნიშნა გიორგი სიორიძემ.