ინფექციური საავადმყოფოს დირექტორის, თენგიზ ცერცვაძის განცხადებით, კორონავირუსის შემთხვევების რაოდენობის ზრდას ვერ ავცდებით, თუ ლოქდაუნს არ შემოვიღებთ.

"ახალი შემთხვევების მზარდი რაოდენობის პირობებში და ამას ვერ ავცდებით, თუ არ შემოვიღებთ ლოქდაუნს და თუ არ შემოვიღებთ კარანტინს და ჩაკეტვებს, რისი გაკეთებაც ჩვენს ქვეყანას, განსხვავებით ევროპის და ამერიკის ქვეყნებისგან, არ უნდა", — განაცხადა ცერცვაძემ.

ინფექციური საავადმყოფოს დირექტორის თქმით, ლოქდაუნის არ გამოცხადების ერთ-ერთი მიზეზია ქვეყანაში მიმდინარე საარჩევნო პროცესი.

"ჩვენ ამაზე არ მივდივართ, რათა მოსახლეობამ არ განიცადოს ის სერიოზული დისკომფორტი, რაც გვქონდა მარტში და აპრილში და არ მოხდეს ეკონომიკის ხელმეორედ გაჩერება და რეცესია. პლუს, ძალიან მნიშვნელოვანი პროცესი, საარჩევნო პროცესი, რათა ოდნავ ჩრდილი არ მიადგეს ამ საარჩევნო პროცესს და ვიღაცამ არ თქვას, რომ მან ვერ გამოიჩინა სათანადო აქტივობა. იქნება ეს მიტინგები, თუ იქნება ეს შეკრებები, თუ სხვა იმიტორმ, რომ იყო ლოქდაუნი ან ჩაკეტვა", — განაცხადა ცერცვაძემ.

6 ნოემბრის მონაცემებით, საქართველოში კორონავირუსის 2 775 ახალი შემთხვევა დადასტურდა. სულ ქვეყანაში კორონავირუსით ინფიცირებულთა რიცხვი 51 993-ია.