დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, გამომდინარე იქიდან, რომ არსებობს ადამიანის ფუნდამენტური უფლება — გამოხატვის თავისუფლება, მიმდინარე საპროტესტო აქციებთან დაკავშირებით მხოლოდ რეკომენდაციებით უნდა შემოვიფარგლოთ. ამის შესახებ გამყრელიძემ საკოორდინაციო საბჭოს დასრულების შემდეგ ისაუბრა.

"ნებისმიერი პოლიტიკური თუ არაპოლიტიკური დიდი თავყრილობები არის წინააღმდეგ ჩვენება პანდემიის მიმდინარე პროცესში და მეოთხე რეკომენდაცია, ჩემს ხუთ რეკომენდაციაში, არის არიდება დიდი თავყრილობისაგან, მაგრამ მეორე მხარეს არის ადამიანის ფუნდამენტური უფლება, ადამიანის გამოხატვის თავისუფლება. ამიტომ მხოლოდ და მხოლოდ რეკომენდაციით უნდა შემოვიფარგლოთ, რომ დაცული იყოს აქციაზე დისტანცია და ყველას უნდა ჰქონდეს პირბადე", — განაცხადა გამყრელიძემ.

საოლქო საარჩევნო კომისიებთან საპროტესტო აქციები მიმდინარეობს. 31 ოქტომბრის საპარლამენტო არჩევნების შედეგებს ოპოზიცია არ აღიარებს და ქუჩაში საპროტესტო აქციებს მართავს. პარტიებმა საკანონმდებლო ორგანოში შესვლაზე უარი უკვე თქვეს. ოპოზიციის ერთობლივი აქციაა დაგეგმილი კვირას, 8 ნოემბერსაც.