ჯანდაცვის მინისტრის ეკატერინე ტიკარაძის თქმით, ქუთაისში კორონავირუსით გარდაცვლილი 27 წლის გოგო სახლში მკურნალობდა, რამაც გამოიწვია მისი დაგვიანებული ჰოსპიტალიზაცია, მინისტრის თქმით, დიაგნოსტიკაც დაგვიანებული იყო.

"რაც შეეხება 27 წლის გოგოს შემთხვევაზე, რა თქმა უნდა, არის ძალიან სამწუხარო ფაქტი, რამდენადაც ჩვენ ეს შემთხვევა შევისწავლეთ, ახალგაზრდა გოგო მკურნალობას გადიოდა ბინაზე, რამაც გამოიწვია დაგვიანებული ჰოსპიტალიზაცია, შესაბამისად იქ დიაგნოსტირებაც იყო გვიანი, მას ტესტირებისთვისაც კი არ მიუმართავს დროულად. ვერიდები წვრილმანების დეტალიზაციას, ვინაიდან ეს ბრალეულობა არ გადავიდეს პაციენტების მხარეს. მინდა, რომ ჯანდაცვის სექტორი იყოს მაპსუხისმგებელი ყველა ქმედებასა და შედეგეზე", — განაცხადა ტიკარაძემ.

1 ნოემბერს ქუთაისში 27 წლის კოვიდინფიცირებული გარდაიცვალა. ჯანდაცვის სამინისტროს ცნობით, პაციენტს კორონავირუსი 31 ოქტომბერს დაუდასტურდა. უწყების განცხადებით, აღნიშნულ პაციენტთან დაკავშირებით, სასწრაფო სამედიცინო დახმარების ცენტრში გამოძახება ორჯერ დაფიქსირდა.