გირჩი მთავრობას მოუწოდებს, არ დააწესოს კორონავირუსთან დაკავშირებით დაანონსებული შეზღუდვები. პარტიაში მიიჩნევენ, რომ ეს შეიძლება აღქმული იყოს 8 ნოემბერს დაგეგმილი აქციის ორგანიზებაში ხელის შეშლად.

"მოვუწოდებთ და ვურჩევთ მთავრობას, არ მიიღოს არც ერთი გადაწყვეტილება, რომელიც დაკავშირებულია დაანონსებულ შეზღუდვებთან და რაც შეიძლება აღქმული იყოს 8 ნოემბრის პოლიტიკური აქციის ორგანიზებაში ხელის შეშლად. პოლიტიკურ ოპოზიციას და ოპოზიციურ მედიას ვურჩევთ, გაემიჯნონ ვირუსთან შეზღუდვებით ბრძოლის სტრატეგიას და დაუჭირონ მხარი იძულებითი შეზღუდვების დაუყონებლივ გაუქმებას და ქვეყნის საზღვრების გახსნას", — აცხადებენ გირჩში.

მთავრობის მიერ შეზღუდვების არ მოხსნის და დაანონსებული ახალი შეზღუდვების ამოქმედების შემთხვევაში, გირჩი ყველას მოუწოდებს, 8 ნოემბერს გამოვიდნენ არა მხოლოდ არჩევნების გაყალბების, არამედ მთავრობის ქმედებების წინააღმდეგაც, რომლებმაც, მათი თქმით, უმძიმეს სიტუაციამდე მიგვიყვანა.

ამასთან, პარტიაში აცხადებენ, რომ ვირუსთან ბრძოლა ხელისუფლების პოლიტიკურ იარაღად იქცა.

"თუ ადრე მოსახლეობაზე მზრუნველობის მოტივით ადამიანების დევნა, მმართველი პარტიის რეიტინგის ზრდას ემსახურებოდა, ახლა ძალაუფლების ხელში ჩაგდების მიზნით გამოიყენება. შეზღუდვები ანადგურებს ეკონომიკას, ქმნის პოლიტიკური დაძაბულობისთვის ხელსაყრელ ფონს იმ პირობებში, რომ ვერანაირ პოზიტიურ გავლენას ინფექციის გავრცელებაზე ვერ ახდენს და ეპიდემიას უფრო საშიშადაც აქცევს. ასეთი მიდგომა არ აძლევს ადამიანს შესაძლებლობას გამიჯნოს, თუ რა არის ნამდვილი თავდაცვის საშუალება და რა არის პოლიტიკური სპექტაკლის ნაწილი", — აღნიშნავენ გირჩში.

რეგიონული განვითარებისა და ინფრასტრუქტურის მინისტრის, მაია ცქიტიშვილის ინფორმაციით, საკოორდინაციო საბჭო მსჯელობს იმაზე, თუ რა დამატებითი ღონისძიებები და წერტილოვანი შეზღუდვების დაწესებაა შესაძლებელი ვირუსის გავრცელების თავიდან ასაცილებლად. მისი თქმით, ეს შეიძლება უკავშირდებოდეს ღამის საათებში გადაადგილებას, ტრანსპორტს, დიდ სავაჭრო ცენტრებსა და ბაზრობებს.

გარდა ამისა, დღე პრემიერმინისტრმა გახარიამ სრული მობილიზაციისკენ მოუწოდა ყველა სამინისტროსა და უწყებას და განაცხადა, რომ წერტილოვანი შეზღუდვების გააქტიურებაზე უნდა დაიწყონ ფიქრი.