შაბათს, 31 ოქტომბერს, სლოვაკეთის მოსახლეობის თითქმის ნახევარმა გაიკეთა COVID-19-ის ანტიგენის ტესტი. ეს იყო პირველი დღე ეროვნული მასშტაბის იმ ორდღიანი ტესტირებისა, რომელიც, ქვეყნის მთავრობის მოლოდინით, ვირუსის გავრცელების თავიდან არიდებას შეუწყობს ხელს ისე, რომ მკაცრი კარანტინი საჭირო არ გახდეს.

ამ გეგმას, რომელიც პირველად ხორციელდება სლოვაკეთის ზომის ქვეყანაში, ის ქვეყნები აკვირდებიან, რომლებსაც ვირუსის გავრცელების შენელება და ჯანდაცვის სისტემის გადატვირთვის თავიდან არიდება სურთ.

კვირას, 1-ლ ნოემბერს, თავდაცვის მინისტრმა იაროსლავ ნადმა თქვა, რომ 2.58 მილიონმა სლოვაკმა გაიარა ტესტირება და მათგან ვირუსი 25 850-ს, ანუ 1%-ს, აღმოაჩნდა. ინფიცირებულები კარანტინში გადაიყვანეს.

ევროკავშირის წარმომადგენელი ქვეყნის მოსახლეობა 5.5 მილიონია და ის გეგმავს, რაც შეიძლება მეტ ადამიანს გაუკეთოს ტესტი, 10 წლამდე ბავშვების გამოკლებით.

ანტიგენზე ტესტირების ჩასატარებლად 5 000-ზე მეტ ადგილას 40 000 ექიმი და მათი დამხმარე ჯარისკაცები, პოლიციელები, ადმინისტრაციული მუშაკები და მოხალისეები მობილიზდნენ. ტესტირება უფასო და ნებაყოფლობითი იყო, თუმცა მთავრობამ განაცხადა, რომ კარანტინში მოაქცევდა მათ, ვინც მონაწილეობას არ მიიღებდა, მათ შორის აუკრძალავდა სამსახურში სიარულს.

პრემიერმინისტრმა იგორ მატოვიჩმა ხალხს მათზე მონაწილების მიღების ზეწოლის გამო ბოდიში მოუხადა, თუმცა განაცხადა, რომ ეს მოთხოვნები გამართლებული იყო.

"თავისუფლებას თან უნდა ახლდეს პასუხისმგებლობა მათ მიმართ... ვინც ჩვენ შორის ყველაზე სუსტია: ონკოლოგიური პაციენტები, მოხუცებულები, სხვა დაავადებების მქონე ხალხი", — განაცხადა მან.

სლოვაკეთში ვირუსის შედარებით ცოტა შემთხვევა იყო გაზაფხულსა და ზაფხულში, შეზღუდვების სწრაფად დაწესების შემდეგ. მიუხედავად ამისა, ბოლო კვირებში ვირუსი სწრაფად გავრცელდა და გააჩინა იმის საშიშროება, რომ ქვეყანა ჩეხეთის ბედს გაიზიარებდა, რომელსაც ევროპაში სიკვდილიანობის ყველაზე მაღალი ორკვირიანი მაჩვენებელი აქვს.

ამ გეგმას ზოგიერთი ექსპერტი შეეწინააღმდეგა, რომელთა თქმითაც მსგავს ერთჯერად ზომას დიდი აზრი არ ჰქონდა, აგრეთვე გამოყენებული ანტიგენის ტესტები უფრო ნაკლებად ზუსტია, ვიდრე ლაბორატორიული PCR ტესტები, ამიტომაც მათ შეიძლება უფრო მეტი მცდარი უარყოფითი და მცდარი დადებითი პასუხები აჩვენონ.

მომავალ შაბათ-კვირას ხელისუფლება ტესტირების მეორე რაუნდს გეგმავს.

კვირას, 1-ლ ნოემბერს, სლოვაკეთში 2 282 ახალი შემთხვევა დაფიქსირდა PCR ტესტების გამოყენებით, რითაც ჯამური შემთხვევების რაოდენობა 59 946 გახდა. ამ რიცხვში არ შედის ეროვნული მასშტაბის გეგმით იდენტიფიცირებული შემთხვევები.