განათლების მინისტრის, მიხეილ ჩხენკელის განცხადებით, უფროსკურსელებისთვის სწრაფი სპეციალური კურსის გავლის პროცესი დაიწყო.

"უწყებათაშორისი საბჭოს გადაწყვეტილების შესაბამისად, მე შევხვდი სამედიცინო უნივერსიტეტების რექოტრებს, ასევე, სამედიცინო ფაკულტეტების დეკანებს და დაიწყო პროცესი უფროსკურსელებისთვის სწრაფი სპეციალური კურსის გავლის, რომ მათ ჰქონდეთ მზაობა საჭიროების შემთხვევაში ჩვენს ექიმებს დაეხმარონ კოვიდსიტუაციის მართვის მიმართულებით. შესაბამისად, მომავალ ორშაბათს უკვე ერთგვარი სამედიცინო რეზერვი, ანუ უფროსკურსელთა ბაზა, რომელმაც გაიარეს ეს ტრენინგი უკვე მზად იქნება. ეს იქნება ბაზა იმ უფროსკურსელების, რომლებიც საჭიროების შემთხვევაში დაეხმარებიან ჩვენს ექიმებს", — განაცხადა ჩხენკელმა.

ჩხენკელის განცხადებით, სამედიცინო ფაკულტეტის უფროსკურსელები ექიმებს არ ანაცვლებენ, ისინი მათ დაეხმარებიან და ასისტირებას გაუწევენ.

"ამ თვალსაზრისით მიმდინარეობს მომზადება უფროსკურსელების და, ცხადია, ეს იქნებიან მოხალისეები, მოხალისეთა ბაზა და საჭიროების შემთხვევაში ჩვენს ექიმებს ისინი დაეხმარებიან. ეს მათი ცოდნისთვისაც მნიშვნელოვანია", — განაცხადა განათლების მინისტრმა

მისივე თქმით, მიმართულებების იდენტიფიკაცია მოხდება იმის მიხედვით, თუ რა საჭიროება იქნება კონკრეტულ სიტუაციაში.

"სწრაფი კურსია. მიმართულებების იდენთიფიკაცია მოხდება იმის მიხედვით, თუ რა საჭიროება იქნება კონკრეტულ სიტუაციაში, მაგალითად, აქ შედის, როგორც ქოლცენტრში თანამშრომლობა, ასევე, კოვიდსასტუმროში, ან საკარანტინე სივრცეში", — თქვა ჩხენკელმა.

მიხეილ ჩხენკელმა 26 ოქტომბერს განცხადა, რომ სამედიცინო მიმართულების უფროსკურსელებს გადაამზადებენ და მედპერსონალის რეზერვი შეიქმნება. მისი თქმით, სტუდენტები გაივლიან სწრაფ კურსს და საჭიროების შემთხვევაში ჩაერთვებიან კოვიდის სამედიცინო მენეჯმენტში.