საპატრიარქოს საზოგადოებასთან ურთიერთობის სამსახურის განცხადებით, არჩევნების წინ დავით გარეჯის თემის წინ წამოწევა ეკლესიას არ უკავშირდება.

"დღეს, არჩევნების წინ, ამ თემის წინ წამოწევა ეკლესიას საერთოდ არ უკავშირდება. ჩვენი მხრიდან სათქმელი ითქვა მაშინ, როდესაც ფაქტების დამადასტურებული დოკუმენტები მივიღეთ", — განაცხადა საპატრიარქომ.

მათივე თქმით, პატრიარქს თავდაცვის მინისტრმა, ირაკლი ღარიბაშვილმა შეხვედრის დროს გააცნო ბოლო დროს მოპოვებული კარტოგრაფიული მასალა.

"2020 წლის 23 სექტემბერს საქართველოს საპატრიარქოში სრულიად საქართველოს კათოლიკოს-პატრიარქ ილია II-სა და მღვდელმთავრებს შეხვდა საქართველოს თავდაცვის მინისტრი, ბატონი ირაკლი ღარიბაშვილი თანმხლებ პირებთან ერთად. თავდაცვის მინისტრმა კათოლიკოს-პატრიარქს გააცნო ბოლო დროს მოპოვებული კარტოგრაფიული მასალა, კერძოდ, ის დოკუმენტაცია, რომელიც ბატონმა დავით ხიდაშელმა სხვადასხვა ქვეყნის არქივებსა და შესაბამის უწყებებში მოიპოვა და საქართველოში ჩამოიტანა. ასევე შესაბამისი ექსპერტების მიერ მომზადებული დასკვნებიც", — აცხადებს საპატრიარქო.

მათი თქმით, ბოლო ორი წლის განმავლობაში პატრიარქმა არაერთი განცხადება გააკეთა, წერილობითაც მიმართა აზერბაიჯანის სულიერ ლიდერს და საქართველოს ხელისუფლებას ქმედითი ნაბიჯების გადადგმა სთხოვა, რათა აღნიშნული ტერიტორია კითხვის ნიშნის ქვეშ არ დამდგარიყო.