საზოგადოებრივი მაუწყებლის სამეურვეო საბჭომ გენერალური დირექტორი ვერ აირჩია. დირექტორობის 5 კანდიდატიდან ვერცერთმა მიიღო ხმების ის რაოდენობა -5 ხმა, რაც აუცილებელი იყო გენერალურ დირექტორად არჩევისთვის. სამეურვეო საბჭო კანდიდატებს კიდევ ერთხელ უყრის კენჭს.

კენჭისყრის შედეგებით დირექტორობის კანდიდატებს შორის ხმები ასე გადანაწილდა:

  • ზაალ ანჯაფარიძე -0
  • თინათინ (თიკო) ბერძენიშვილი - 2
  • ნათია კუპრაშვილი - 1
  • ვასილ მაღლაფერიძე - 4
  • ნინო ზაუტაშვილი - 1

ამ კანდიდატებიდან სამეურვეო საბჭო ხელმეორედ კენჭს თინათინ ბერძენიშვილსა და ვასილმაღლაფერიძეს უყრის. თუ მათგან გამარჯვებული ვერ გამოვლინდა კონკურსი ხელახლა ცხადდება. თუ ხმები გაიყო, ამ შემთხვევაში ტარდება ღია კენჭისყრა.

გთავაზობთ გენერალური დირექტორობის კანდიდატების ბიოგრაფიულ მონაცემებს:

ზაალ ანჯაფარიძე ბოლო 11 წელია ევროპის ფონდში სამოქალაქო საზოგადოების პროგრამების უფროსი მენეჯერის თანამდებობაზე მუშაობს, მანამდე კი USAID-ის სხვადასხვა პროექტში, ინგლისურენოვან ყოველკვირეულ გაზეთში Georgia Today-ში, Jamestown Foundation-ში, კავკასიის მშვიდობის, დემოკრატიის და განვითარების ინსტიტუტში და გაზეთ „რეზონანსში“ მუშაობდა.

თინათინ (თიკო) ბერძენიშვილი, გიორგი ბარათაშვილის თანამდებობიდან გადადგომის შემდეგ, მაუწყებლის გენერალური დირექტორის მოვალეობას ასრულებს. ის არხის მედიის და კომუნიკაციების ბლოკის დირექტორია. 2011 წლიდან ბერძენიშვილი საზოგადოებრივ მაუწყებელში წამყვანის, საზოგადოებასთან ურთიერთობის სამსახურის უფროსისა და მარკეტინგის დეპარტამენტის დირექტორის თანამდებობას იკავებდა. მან ჟურნალისტური საქმიანობა 1997 წელს გაზეთში, ქართულ ფილმი, დაიწყო. გარდა ამისა, სხვადასხვა დროს მუშაობდა ტელე-რადიო კომპანია აუდიენციაში, ტელეკომპანია იმედში, არტ იმედში და სადაზღვევო საბროკერო კომპანია NLI LTD-ში.

ნათია კუპრაშვილი 2009 წლიდან საქართველოს რეგიონულ მაუწყებელთა ასოციაციის აღმასრულებელი დირექტორია, 2011 წლიდან ივანე ჯავახიშვილის სახელობის თბილისის სახელმწიფო უნივერსიტეტის ასოცირებული პროფესორია. სხვადასხვა დროს იყო საქართველოს ჟურნალისტური ეთიკის ქარტიის საბჭოს წევრი და თავმჯდომარე, კოალიცია მედიის ადვოკატირებისთვის წევრი და კოორდინატორი. ჟურნალისტური საქმიანობა 1995 წელს დაიწყო და მუშაობდა რეგიონულ გაზეთებში: კვირა, რაკურსი, მთავარი იმერეთში.

ვასილ მაღლაფერიძე ვასილ მაღლაფერიძე, CV-ის მიხედვით, ამ ეტაპზე უმუშევარია, ბოლოს კი საქართველოს ყოფილი პრემიერ-მინისტრის ბიძინა ივანიშვილი ოჯახის კუთვნილ ტელეკომპანია GDS-ში გადაცემა 2030-ის გენერალურ პროდიუსერად მუშაობდა. მისი მედიაში მუშაობა ტელეკომპანია GDS-ით არ შემოიფარგლება. სხვადასხვა დროს იყო TV9-ის, რომელიც ასევე ბიძინა ივანიშვილის ოჯახს ეკუთვნის, დირექტორის მოადგილე, ჟურნალ კალმასობა-ს მთავარი რედაქტორი, გაზეთ „კავკასიონის“ დამფუძნებელი, რედაქტორი და მთავარი კონსულტანტი. გარდა ამისა, 2 მოწვევის პარლამენტის წევრი, „ნაციონალური მოძრაობის“ ხელისუფლებაში ყოფნის დროს გუბერნატორი და სახალხო დამცველის აპარატის ინფორმაციისა და პოლიტიკის დეპარტამენტის უფროსი.

ნინო ზაუტაშვილი 1986-2002 წლებში სახელმწიფო ტელევიზიაში (ამდროინდელი საზოგადოებრივი მაუწყებელი) მუშაობდა სხვადასხვა პოზიციაზე, 2002-2009 წლებში ის იყო ტელეკომპანია იმედის შემეცნებითი და გასართობი გადაცემების მთავარი პროდიუსერი და წამყვანი. ზაუტაშვილმა 2009 წელს მუშაობა ისევ საზოგადოებრივ მაუწყებელში გააგრძელა, გადაცემა სამოთხის ვაშლების წამყვანის პოზიციაზე, სადაც 2014 წლამდე იმუშავა. 2013 წლის სექტემბრიდან ის არის გადაცემა რეალური სივრცის ავტორი და წამყვანი.

თავდაპირველად, საზოგადოებრივი მაუწყებლის გენერალური დირექტორობა სულ 15 კანდიდატს სურდა, მათგან ბაჩუკი ბახტაძე კონკურსს სამეურვეო საბჭოს მიერ მათი დოკუმენტაციის გაცნობის შემდეგ გამოეთიშა. სამეურვეო საბჭოს 3 იანვრის კენჭისყრის შედეგებით კი, საბჭო გაესაუბრა თინათინ ბერძენიშვილს, ვასილ მაღლაფერიძეს, ზაალ ანჯაფარიძეს, ნინო ზაუტაშვილსა და ნათია კუპრაშვილს.